Britaniyalik aktrisa Meggi Smit 27-sentyabr kuni 89 yoshda olamdan o‘tdi. Bu haqda “People talk” uning farzandlari Tobi Stivens va Kris Larkinga asoslanib xabar bermoqda. Ularning so‘zlariga ko‘ra, aktrisa hayotining so‘nggi kunlarini Londonning Chester shifoxonasida yaqinlari bilan o‘tkazgan.
Meggi Smit kino ixlosmandlariga Garri Potter haqidagi filmlarda professor Minerva Makgonagall roli, “Daunton abbatligi” serialidagi ijrosi va boshqa ko‘plab kartinalari bilan tanish. U ikki karra “Oskar” mukofotining laureati bo‘lgan va 1970-yilda aktrisa “Miss Jin Brodining tongi”, 1979 yilda “Kaliforniya oteli” filmlari uchun taqdirlangan.
Yoshi 70 dan oshganiga qaramay, aktrisa o‘zi yoqtirgan ish bilan shug‘ullanishda davom etdi. Meggi Smit 1947-yildan 2023-yilgacha 160 dan ortiq loyihalarda, jumladan “Jeyn Ostenning sirli bog‘i”, “Quyosh ostidagi yovuzlik” kabi filmlarida ishtirok etdi.
Smit xonim ikki marta turmushga chiqqan. 1967-yilda u hayotini hamkasbi Robert Stivens bilan bog‘ladi va Kris ismli o‘g‘il ko‘rdi. Ikki yil o‘tgach, ularning ikkinchi o‘g‘li Tobi tug‘ildi. Biroq juftlik oradan besh yil o‘tib ajrashib ketdi.
Foto: People talk
1975-yilda Meggi ikkinchi marta dramaturg Beverli Krossga turmushga chiqdi. 2007-yilda Garri Potter haqidagi filmning oltinchi qismini suratga olish paytida Meggi o‘zini yomon his qildi va shifokorlar unga ko‘krak bezi saratoni tashxisini qo‘ydi. Shunga qaramay aktrisa filmda suratga tushishda to‘xtamadi va ishini oxirigacha davom ettirdi.
Meggi Smit Oskar sovrindori bo‘lishdan tashqari yetti marta BAFTA mukofotini olgan, uch karra Oltin globus va to‘rt karra Emmi mukofoti sovrindori bo‘lgan. Aktrisa ishtirokidagi boshqa filmlar qatorida «Nildagi o‘lim», «Missioner», «Birinchi rafiqalar klubi» kabilar bor.
Izoh (0)