Amerikalik aktrisa Jena Roulends 94 yoshida hayotdan ko‘z yumdi. Bu haqda Variety nashriga tayanib “Pravila jizni” xabar bermoqda.
Bundan roppa-rosa 20 yil avval Rayan Gosling va Reychel Makadams ishtirokidagi “Xotira kundaligi” filmida aktrisa Elli Hemilton rolini ijro etgan. Film syujetiga ko‘ra, voqea qariyalar uyida sodir bo‘ladi. U yerda keksayib qolgan juftlik — Noy Kelhaun aqli zaiflikdan aziyat chekayotgan rafiqasi Elli Hemiltonga ularning yoshlikdagi muhabbati haqida hikoya qiladi va hayotining eng yorqin lahzalarini yodga oladi.
Film rejissyori Nik Kassavetis mazkur filmga uning karyerasiga unchalik katta ta’sir qilmaydigan navbatdagi melodrama sifatida qaragan edi. Shuning uchun u keksa Elli rolini o‘ynaydigan aktrisani tanlash vaqti kelganida o‘z onasini taklif qildi. Rejissyorning onasi Jena Roulends yoshligida juda muvaffaqiyatli aktrisa edi. Shu sababli bu qaror bir ovozdan ma’qullandi.
Biroq oradan 20 yil o‘tgach, Kassavetis bu rolni onasiga ishonib topshirganidan afsusda ekanini aytdi. Jena rolni qoyilmaqom ijro etgan bo‘lsa-da, endilikda uning hayotida xuddi filmdgi voqealar takrorlana boshladi: Jena xotirasini yo‘qotdi va Alsgeymer kasalligiga chalindi. Betob aktrisa keksayganda ko‘p mashaqqatlar ko‘rdi va 14-avgust kuni Kaliforniyadagi uyida 94 yoshida vafot etdi.
Joriy yilning boshida uning o‘g‘li Nik Kassavetis onasi Alsgeymer kasalligidan aziyat chekayotganini ma’lum qilgan edi.
“Onam so‘nggi besh yil davomida ushbu kasallikdan aziyat chekib kelmoqda. Hozirda u butunlay aqldan ozgan. Biz kechirgan voqealar haqiqiy dahshatdek edi. Axir u avvaliga bularning barchasini ekranda yashab o‘tdi, endi esa bularning bari hayot haqiqatining bir qismiga aylandi”, degan edi Nik Kassavetis.
1950-yillarda Roulends teatr va televideniye sohasida faoliyatini boshladi. Keyin aktrisa bir nechta teleseriallarda: “87-uchastka”, “Bonanza” va “Alfred Hichkok taqdim etadi” kabi loyihalarda ishtirok etdi.
Jena Roulends hayoti davomida yuzdan ortiq filmlarda, jumladan, “Yerdagi tun”, “Gloriya” va “O‘zida bo‘lmagan ayol” filmlarida suratga tushgan. U to‘rt karra “Emmi” mukofoti, ikkita “Oltin globus” mukofotini olgan, shuningdek, “O‘zida bo‘lmagan ayol” va “Gloriya” filmlaridagi roli uchun “Oskar”ga nomzod bo‘lgan.
Izoh (0)