Suriyaning Suvayda shahrini hukumat qo‘shinlari tark etganidan so‘ng noma’lum qurolli guruhlar arab badaviy ko‘ngillilarini ommaviy ravishda qatl etdi. Bu haqda SANA axborot agentligi ma’lum qildi.
Agentlikning joylardagi manbalariga ko‘ra, shaharning sharqiy qismidagi al-Mikuas tumanida tinch aholi, jumladan ayollar va bolalar ommaviy tarzda o‘ldirilgan. Ushbu hujumlar oqibatida halok bo‘lganlar va jabrlanganlarning aniq soni hozircha noma’lum.
Ta’kidlanishicha, tirik qolgan badaviylar yangi hujumlar tahdididan so‘ng yashash joylarini shoshilinch tark etmoqda.
O‘z navbatida, Suriyaning Al Watan gazetasi Suvaydadagi tartibsizliklar ortida Isroil bilan yaqinlashishni yoqlovchi va yaqinda Damashq hukumatiga itoat etmaslikka da’vat qilgan radikal druz shayxi Hikmat al-Hajariy tarafdorlari turganini ta’kidlamoqda.
Suriya janubidagi vaziyat 13-iyul kuni aholisining aksariyati druzlardan iborat bo‘lgan Suvayda viloyatida arab qabilalari ko‘ngillilari va druzlarning o‘zini o‘zi mudofaa qilish otryadlari o‘rtasida to‘qnashuvlar boshlanishi bilan keskinlashdi. 15-iyul kuni Suriya armiyasi viloyatning shu nomdagi ma’muriy markaziga kirib, vaziyatni barqarorlashtirish maqsadida uni tozalashga kirishdi. Ko‘p o‘tmay Isroil Suriya Qurolli kuchlari harbiy kolonnalariga zarba bera boshladi. Buni u viloyatning druz aholisini himoya qilish istagi bilan asosladi va 16-iyul kuni Suriya poytaxtidagi bir nechta strategik obyektlarni o‘qqa tutdi.
Shundan so‘ng Suriya Mudofaa vazirligi o‘t ochishni to‘xtatish bo‘yicha erishilgan kelishuvga muvofiq, barcha harbiy kuchlarni As-Suvayda shahridan olib chiqilganini e’lon qildi. Bayonotda aytilishicha, qo‘shinlar shaharni noqonuniy guruhlardan tozalash yakunlanganidan so‘ng Suvaydani tark etgan, endi uni politsiya kuchlari nazorat qiladi. Druzlarning diniy rahbari shayx Yusuf Jarbu’a, Hikmat al-Hajariydan farqli o‘laroq, harbiy harakatlarni butunlay to‘xtatish to‘g‘risidagi kelishuvni ma’qullagan.
Izoh (0)