Mozori Sharif aholisi oilasi va do‘stlari bilan sovuq kunlarda shahardagi baliq pishiradigan restoranlarga boradi. Xol Muhammad shunday mijozlarga xizmat ko‘rsatuvchilardan biri bo‘lib, 20 yildan ortiq baliq pishirgan. U “Daryo” muxbiri bilan suhbatda ob-havoning sovuqlashishi va qishning boshlanishi bilan ish faollashgani, ko‘pchilik baliq xarid qilishga kelishini aytdi.
Xol Muhammadning so‘zlariga ko‘ra, kimning sharoiti va iqtisodi yaxshi bo‘lsa, O‘zbekiston chegarasi yaqinidagi Hayraton shahriga baliq sotib olish uchun boradi. Chunki Amudaryo baliqlari mazali va narxi chet el baliqlarinikidan uch baravar qimmat.
Bizda barcha turdagi baliqlar bor, qish mavsumida turli viloyatlardan odamlar tashrif buyuradi, oilalar keladi, bizda mahalliy baliqlar juda ko‘p, ularning sifati va ta’mi Pokistonnikidan ancha yuqori, deydi baliq pishiruvchi oshpaz Yusuf.
U “Daryo” muxbiri bilan suhbatida baliq bozori avvalgidek emasligi, ammo baribir shu bilan kun kechirishini ta’kidladi. Yusuf mijozlar soni asosan qishda ko‘payishini bildirdi.
Afg‘onistonda mahalliy baliq yetishmasligi sababli asosan bozorlarda Pokistonniki sotiladi, deydi mozori shariflik yana bir baliq sotuvchi Nosir.
U qishda daryolarda suvning kamayishi mahalliy baliqlar savdosiga ham ta’sir qilishi, savdogarlar Afg‘onistonga tashqi bozorlardan, xususan, Pokistondan baliq olib kelishga majbur bo‘layotganini aytdi. Nosirning ta’kidlashicha, Pokiston baliqlarining bir kilogrammi 200 dan 350 afg‘onigacha (18-noyabrdagi kurs bo‘yicha 37 600 so‘mdan 66 ming so‘mgacha), mahalliy baliqlar esa 600 dan 1000 afg‘onigacha (113 mingdan 188 ming so‘mgacha) sotiladi. Odamlar narxi tufayli mahalliy baliqdan ko‘ra Pokistonnikini afzal biladi.
Izoh (0)