Sovuq havo kirib kelishi bilan Afg‘onistonda uloq musobaqasi boshlanadi. “Daryo” muxbiri Mozori Sharif shahrida bo‘lib o‘tgan to‘yoldi uloq musobaqasiga tashrif buyurdi.
Uloq Afg‘onistondagi anʼanaviy va jamoaviy sport turi hisoblanib, u mamlakat shimolidagi o‘zbek va turkman xalqlari orasida keng tarqalgan. U asosan kuz, qish va bahorda mamlakatning shimoliy va shimoli-sharqidagi hududlarda odatda juma kunlari o‘tkaziladi.
Musobaqa tomoshabinlaridan biri afg‘onistonlik iqtisodiy ahvoli yaxshi bo‘lgan o‘zbeklar va turkmanlar to‘y marosimlarida uloq musobaqasini o‘tkazishini aytdi.
Balx viloyatining Shulgara tumanida yashovchi Nodirbek “Daryo” muxbiri bilan suhbatda ukasining to‘yiga hozirlik ko‘rayotganini ma’lum qildi. Uning so‘zlariga ko‘ra, to‘y marosimlarida do‘stlar, qarindosh-urug‘lar, shuningdek, uloq musobaqasi uchun esa oti bo‘lgan har bir kishi uzoq qishloqlardan ham to‘y marosimiga taklif qilinadi.
“Uloq biz o‘zbeklarning urf-odati va madaniyatidir. Bunday marosimlarni o‘tkazish orqali madaniyatimizni saqlab qolishimiz kerak”, deydi Nodirbek.
- Uloq sporti 1994-yilda Afg‘onistonning rasmiy milliy sport turi sifatida tan olingan.
Ushbu an’anaviy va uzoq tarixga ega sport turi afg‘on madaniyatining bir qismi hamdir. Afg‘onistonda mazkur musobaqa odatda bayramlarda, to‘ylarda va milliy bayramlarda o‘tkaziladi.
Izoh (0)