AQSH Federal qidiruv byurosi (FQB) shu hafta Nyu York fond birjasi binosini portlatib yuborishni rejalashtirgan Florida shtatida yashovchi 30 yoshli erkakni qo‘lga oldi. Bu haqda CBS News telekanali xabar berdi.
Maxsus xizmatlar fevral oyida Horun Abdul Malik Yanir ismli erkakda portlovchi qurilmalar yasash bo‘yicha ko‘rsatmalar borligi haqida ma’lumot olgandan so‘ng tergov boshlagan. Tergov natijasida u Nyu York fond birjasi binosi haqida ma’lumot to‘plagani, portlatish qurilmasi uchun detallar sotib olgani va “Qo‘shma Shtatlar hukumatini qayta ishga tushirish” uchun birjani portlatib yuborishni rejalashtirgani aniqlangan.
FQB ma’lumotlariga ko‘ra, o‘tgan hafta hibsga olingan shaxs audio yozib, rejalashtirilgan hujum sabablarini tushuntirgan va “o‘zini (Al-Qoida sobiq rahbari) Usama ben Ladenday his qilayotganini” aytgan. Erkak ISHID terrorchilik guruhiga ham qo‘shilmoqchi bo‘lgan, biroq ular “maqsadlariga erisha olmasligi” tufayli rejasini o‘zgartirgan.
- So‘nggi oylarda AQSHda diqqatga sazovor joylarga hujum qilish bilan bog‘liq bir nechta hibsga olish holatlari kuzatildi. FQB oktyabrda saylov kuni terroristik hujum uyushtirishni rejalashtirgan Afg‘oniston fuqarosini hibsga oldi.
- Qidiruv byurosi avgust oyida Eronga aloqador bo‘lgan Pokiston fuqarosini AQSH hukumati amaldorlari va siyosatchilarni pul evaziga o‘ldirish rejasini tuzishda ayblab qamoqqa olgandi.
Izoh (0)