Birlashgan Millatlar Tashkilotining Afg‘onistonga yordam ko‘rsatish missiyasi (UNAMA) mamlakat rasmiylarini ayollar va qizlarga nisbatan zo‘ravonlikka chek qo‘yish, ularning huquqlari va asosiy erkinliklarining muntazam ravishda rad etilishiga barham berish uchun zudlik bilan chora ko‘rishga chaqirdi.
UNAMA bayonoti butun dunyo ayollarga nisbatan zo‘ravonlikka barham berish xalqaro kuni va gender asosidagi zo‘ravonlikka qarshi 16 kunlik faollik kampaniyasining boshlanishi munosabati bilan e’lon qilindi. Ushbu global kampaniya 25-noyabr – Ayollarga nisbatan zo‘ravonlikka barham berish xalqaro kunidan 10-dekabr – Inson huquqlari kunigacha davom etadi.
“Afg‘onistonda hayotning barcha jabhalarida ayollarga nisbatan davomiy kamsitishlar tufayli zo‘ravonlik holatlari yuqori darajada davom etmoqda. Mamlakatda gender tengligi asosi buzilgani sababli, zo‘ravonlikdan omon qolganlar uchun keng qamrovli, sifatli xizmatlardan foydalanish imkoniyati keskin kamaydi. Shu bilan birga, ushbu xizmatlarga talab keskin oshdi”, deyiladi UNAMA bayonotida.
BMT Bosh kotibining Afg‘oniston bo‘yicha maxsus vakili Roza Otunbayeva taʼkidlaganidek, hozir afg‘onistonlik ayollar va qizlar uchun juda kritik davr bo‘lib, ularga nisbatan zo‘ravonlikka chek qo‘yish uchun adolatni tiklash uchun shoshilinch choralar ko‘rish zarur.
“Ushbu ulkan qiyinchiliklar oldida afg‘on ayollari qadr-qimmat va erkinlik uchun kurashda qat’iyat hamda jasorat ko‘rsatmoqda. Butun mamlakat bo‘ylab ayollar tashkilotlari jabrlanganlarga muhim yordam ko‘rsatishda davom etmoqda, jamoalar va diniy yetakchilar zararli ijtimoiy me’yorlarga qarshi chiqishmoqda. Erkaklar tobora kuchayib borayotgan cheklovlar sharoitida o‘z oilalari va jamiyatlarida ayollarni himoya qilishmoqda”, deyiladi hujjatda.
BMT Ayollar bo‘yicha maxsus vakili Alison Davidian “bugungi kunda afg‘on ayollari va qizlari bir necha avlodlarga qaraganda kamroq huquqlarga ega ekanligi ularning kurashi dolzarbligi va xalqaro hamjamiyat ularning barqarorligi, yetakchiligi va imkoniyatlarini kengaytirishga sarmoya kiritish orqali ularni qo‘llab-quvvatlash bo‘yicha sa’y-harakatlarimizni ikki baravar oshirish zarurligini eslatib turishi”ni qayd etdi.
Davidianning qo‘shimcha qilishicha, “ayollarga nisbatan zo‘ravonlikni dunyoning istalgan joyida, jumladan Afg‘onistonda ham oqlab bo‘lmaydi”.
Izoh (0)