Ijtimoiy tarmoqlarda Toshkentdagi bozorlardan birida bir nechta fuqarolar o‘zaro janjallashgani aks etgan videolar tarqaldi. Holat yuzasidan poytaxt IIBB matbuot xizmati izoh berdi.
Maʼlum qilinishicha, 16-dekabr kuni taxminan soat 09:45 larda Bektemir tumanidagi bozorlardan birida sotuvchilar o‘zaro janjallashgan. Jumladan, 1982-yilda tug‘ilgan N.T., 1984-yilda tug‘ilgan N.M. va 1973-yilda tug‘ilgan A.A.lar ishtirokida janjal kelib chiqqan.
Ushbu huquqbuzarlikni to‘xtatish maqsadida bozor hududida xizmat olib boruvchi profilaktika inspektori hodisa joyiga yetib borgan. Biroq fuqaro N.T. IIO xodimining qonuniy talablarini bajarmasdan, bezorilik xatti-harakatini davom ettirgan. Janjal natijasida hech kim tan jarohati olmagan.
Mazkur holat yuzasidan fuqarolar A.A. va N.M.lar Maʼmuriy javobgarlik to‘g‘risidagi kodeksining 183-moddasi (mayda bezorilik), fuqaro N.T. 183-moddasi (mayda bezorilik) va 194-moddasi (ichki ishlar organlari xodimining qonuniy talablarini bajarmaslik) bilan maʼmuriy javobgarlikka tortilib, sud tomonidan jarima jazosi tayinlangan.
Shuningdek, xodimning videoda aks etgan xatti-harakati yuzasidan Toshkent shahar IIBB tomonidan xizmat tekshiruvi o‘tkazilmoqda.
Izoh (0)