Ijtimoiy tarmoqlarda “Farg‘ona shahar savdo majmuasi”da tadbirkorlar va bozor maʼmuriyati o‘rtasida janjal sodir bo‘lgani haqida videolavhalar tarqaldi. Ushbu holat Farg‘ona viloyati bo‘yicha Milliy gvardiya boshqarmasi tomonidan o‘rganib chiqildi.
Holat 24-iyul kuni soat 13:30 larda sodir bo‘lgan. Kelishmovchilikka asosiy sabab — bozor maʼmuriyati bilan tadbirkor o‘rtasida tuzilgan shartnomaga ko‘ra, tadbirkorlar o‘ziga belgilab berilgan hudud va do‘konlarda savdo qilishi ko‘rsatib o‘tilgan. Biroq ko‘plab tadbirkorlar bozor ichki yo‘laklarigacha tovarlarini chiqarib sotish holatlari aniqlangan.
“Bozor maʼmuriyati favqulodda kelib chiqishi mumkin bo‘lgan holatlar oldini olib tushuntirish ishlarini boshlaganda tadbirkorlar o‘rtasida o‘zaro tushunmovchilik yuzaga kelgan.
Mazkur holat yuzasidan hech kim hech qanday tan jarohati olmagan. Mazkur vaziyatning har bir holati bo‘yicha belgilangan tartibda maʼmuriy ishlar olib borilmoqda”, deyiladi xabarda.
Qo‘shimcha qilinishicha, ayni damda Milliy gvardiya xodimlari bozor hududida belgilangan tartibga ko‘ra xizmat faoliyatini olib bormoqda. Shu bilan birga, savdogarlarga huquqiy tushuntirish ishlari olib borildi.
Izoh (0)