“Bek baraka” bozorida sotuvchi IIO xodimlariga qarshilik qilib, janjal chiqardi (video)

Toshkent viloyati Zangiota tumanidagi “Bek baraka” savdo majmuasida 20-yanvar kuni janjal sodir bo‘ldi. Bu haqda viloyat Ichki ishlar bosh boshqarmasi axborot xizmati xabar berdi.

Aniqlanishicha, savdo majmuasi oldidan o‘tgan, avtomobillar harakatlanishi uchun mo‘ljallangan yo‘lning qatnov qismida (yo‘l yoqasida) va piyodalar o‘tish yo‘lagida, bir nechta fuqarolar yoyma savdo tashkil qilishlari oqibatida, yo‘lda tirbandliklar yuzaga kelgan.

Shuningdek, piyodalar yo‘lagida ham savdo qilinishi sababli yo‘ldan o‘tuvchilarga noqulaylik kelib chiqqan. Ushbu sotuvchilarga bozor ichkarisidan savdo uchun joy ajratib berilgan bo‘lsa ham, yo‘l yoqasida ishlash davomli bo‘lgani uchun haydovchilar, piyodalar va bozor ma’muriyati tomonidan tegishli tashkilotlarga bir qancha murojaatlar kelib tushgan.

Unga ko‘ra, 20-yanvar kuni Zangiota tumani DSI, tuman SEO, Obodonlashtirish va tuman Prokuraturasi xodimlari bilan hamkorlikda o‘rganish ishlari olib borilgan. Jarayonda bozor ma’muriyati va yoyma savdo bilan shug‘ullanuvchilar o‘rtasida o‘zaro tortishuv kelib chiqqan. Shundan so‘ng jamoat tartibini saqlar maqsadida voqea joyiga IIB xodimlari jalb etilgan.

Xizmat faoliyati davomida odamlarni tinchlantirish, tartibni saqlashga keskin qarshilik qilib, janjal ko‘targan bir nafar fuqaro (ayol)ning buyumlari va o‘zi IIB ga olib borilgan. Hech kimga nisbatan tan jarohati yoki noqonuniy, qo‘pol hatti harakatlar qilinmagan. Hozirda holat yuzasidan qo‘shimcha o‘rganish va surishtiruv ishlari olib borilmoqda. Natijasida yuzasidan batafsil axborot beriladi.