Ижтимоий тармоқларда Тошкентдаги бозорлардан бирида бир нечта фуқаролар ўзаро жанжаллашгани акс этган видеолар тарқалди. Ҳолат юзасидан пойтахт ИИББ матбуот хизмати изоҳ берди.
Маълум қилинишича, 16 декабрь куни тахминан соат 09:45 ларда Бектемир туманидаги бозорлардан бирида сотувчилар ўзаро жанжаллашган. Жумладан, 1982 йилда туғилган Н.Т., 1984 йилда туғилган Н.М. ва 1973 йилда туғилган А.А.лар иштирокида жанжал келиб чиққан.
Ушбу ҳуқуқбузарликни тўхтатиш мақсадида бозор ҳудудида хизмат олиб борувчи профилактика инспектори ҳодиса жойига етиб борган. Бироқ фуқаро Н.Т. ИИО ходимининг қонуний талабларини бажармасдан, безорилик хатти-ҳаракатини давом эттирган. Жанжал натижасида ҳеч ким тан жароҳати олмаган.
Мазкур ҳолат юзасидан фуқаролар А.А. ва Н.М.лар Маъмурий жавобгарлик тўғрисидаги кодексининг 183-моддаси (майда безорилик), фуқаро Н.Т. 183-моддаси (майда безорилик) ва 194-моддаси (ички ишлар органлари ходимининг қонуний талабларини бажармаслик) билан маъмурий жавобгарликка тортилиб, суд томонидан жарима жазоси тайинланган.
Шунингдек, ходимнинг видеода акс этган хатти-ҳаракати юзасидан Тошкент шаҳар ИИББ томонидан хизмат текшируви ўтказилмоқда.
Изоҳ (0)