Toshkent viloyati Olmaliq shahri dehqon bozorining xodimi va sotuvchi o‘rtasida janjal kelib chiqqani haqida xabar berilgandi. Viloyat ichki ishlar bosh boshqarmasi matbuot kotibining ma’lum qilishicha, pattachi 15 sutkaga qamaldi.
Ta’kidlanishicha, Olmaliq dehqon bozori xodimi va sotuvchi o‘rtasidagi nizoli holat yuzasidan sud bo‘lib o‘tdi. Sud qaroriga ko‘ra, fuqaro Q.Ikramov (dehqon bozor xodimi) Ma’muriy javobgarlik to‘g‘risidagi kodeksning 183-moddasi (mayda bezorilik) bilan aybli deb topilib, 15 sutka ma’muriy qamoq jazosi tayinlandi.
Shuningdek, fuqaro SH.Irsmetova (sotuvchi) Ma’muriy javobgarlik to‘g‘risidagi kodeksning 21-moddasi (huquqbuzarlikning kam ahamiyatliligi sababli ma’muriy javobgarlikdan ozod qilish)ga asosan ma’muriy javobgarlikdan ozod qilinib, ogohlantirildi.
Ma’lumot uchun, voqea Olmaliq shahri “Oydin” dehqon bozori hududida sodir bo‘lgan. Bozor mas’ul xodimi va sotuvchi ayol bozor patta to‘lovi ustida o‘zaro kelishmay qolib, og‘zaki tortishuv janjalga aylangan. Jarayonda ular bir-birini uyatli so‘zlar bilan so‘kib, jamiyatda yurish-turish qoidalarini qasddan mensimagan.
Izoh (0)