Angliyada shaxsiy suhbatda Yurgen Kloppni haqoratlagan hakam Devid Kutning videosi sizdirilishi bilan janjal kelib chiqdi. Hakamlik uchun mas’ul tashkilot (PGMOL) Kutni jarayonlar ortda qolgunga qadar hakamlikdan chetlatdi.
-NpHHUGFo.jpg)
Qiziqarlisi, aynan shu hakam shanba kuni “Liverpul”ning “Aston Villa”ga qarshi uchrashuvini boshqargan.
Videoda ishlatilgan haqoratlar: “Klopp — ahmoq”, “Liverpul ahmoqlardek o‘ynaydi”.
Daily Mirror holatga quyidagicha tushuntirish berdi: Avvalroq jurnalist Darren Lyuis X (sobiq Twitter) ijtimoiy tarmog‘ida hakam hamma narsani inkor qilganini yozgan edi, ammo Kutning o‘zi go‘yo videoning haqiqiyligini tan oldi. Biroq Kut videoda nima deyilganini yaxshi eslay olmaydi — video bir necha yil oldin yozib olingan. Ijtimoiy uzoqlashish haqidagi kinoyali gaplar koronavirus pandemiyasi va lokdaun davriga ishora qiladi.
Videoda nima deyilgan?
Kut divanda o‘tirgan holda do‘stlari bilan suhbatlashmoqda va o‘zi zaxira hakami bo‘lgan “Liverpul”ning o‘yiniga baho bermoqda: “Liverpul juda rasvo edi”.
Hakam Yurgen Klopp haqidagi savolga shunday javob berdi: “No‘noq. juda no‘noq”. Va yana u qo‘shimcha qildi: “U, ‘Byornli’ga qarshi o‘yindagi ishimi tanqid qilgani bilan birga, meni yolg‘onchilikda ham aybladi. Menga bunday takabbur odamlar bilan muloqot qilish qiziq emas. La’nati nemis”, deya haqorat qilgan.
Kadr ortidan ham kimdir quyidagicha gapirgan: “Qisqasi, Yurgen Klopp — ahmoq, “Liverpul” jamoasining hamma a’zosi ahmoqlar. Biz skauzerlar*dan nafratlanamiz”.
Ikkinchi videoda Kut barchani ogohlantiradi: “Hammangizga tushunarli bo‘lishi uchun aytaman, bu la’nati video hech qayerga tarqalmasin”. Shundan keyin yana bir kishi kadr ortidan “U Premyer Liga hakami, keling, yigitning karyerasini buzmaylik”, deydi.
Videodagi odamlar shirakayf bo‘lgani taxmin qilinmoqda.
Ushbu videodan so‘ng ko‘pchilik hakamning “Liverpul” o‘yinlaridagi turli epizodlarni eslamoqda. Pikfordning Liverpul derbisida chetlatilmagani va van Deykning jarohati eng ko‘p muhokamaga sabab bo‘lmoqda.
● Transfermarkt ma’lumotlariga ko‘ra, Devid “Liverpul”ning sakkizta o‘yinini hakam sifatida boshqargan. Ushbu o‘yinlarda klub besh bor g‘alaba qozongan va ikki bora mag‘lubiyatga uchragan. Klopp shu sakkizta o‘yinning yettitasida “Liverpul”ning bosh murabbiyi bo‘lgan.
● Shanba kuni “Liverpul” Premyer Liganing 11-turida “Aston Villa”ga qarshi o‘yinda 2:0 hisobida g‘alaba qozondi. Birinchi bo‘limda munozarali holat yuz berdi, o‘shanda Darvin Nunyes gol urishdan oldin, Muhammad Saloh Leon Beyli bilan qarama-qarshilikda yiqildi.
Kut goldan keyin qo‘pollikni qayd etib Beylini jazolashi mumkin edi. Hakam o‘yinni davom ettirish mumkinligiga ishora qildi.
Keyinchalik hakam “Liverpul” darvozasiga penalti belgilamadi, mersisaydlik futbolchi Konor Bredlini kechirdi.
● Kutning Klopp haqidagi gaplaridagi o‘yin “Liverpul”ning 2020-yil yozida “Byornli” bilan o‘z uyidagi durangi (1:1) hisoblanadi. Ushbu o‘yinda nafaqat Kloppning, balki Endryu Robertsonning ham jahli chiqqandi: shotlandiyalik futbolchi belgilanmagan penaltidan norozi bo‘lgandi.
● G‘azablangan “Liverpul” muxlislari o‘sha o‘yindan bir necha oy o‘tib sodir bo‘lgan yana bir epizodni esladi.
O‘shanda “Liverpul” derbida “Everton” bilan to‘qnash keldi va Virjil van Deyk Jordan Pikford bilan to‘qnashuvdan keyin uzoq muddatga safdan chiqdi Ingliz OAVlari “Everton” darvozaboni ko‘plab tahdidlar tufayli hattoki tansoqchilarni ham yollagani haqida yozdi.
Ushbu vaziyatda Pikfordga hatto sariq kartochka ham ko‘rsatilmadi — VAR aralashuvni zarur deb hisoblamadi. O‘sha o‘yinda Devid VAR hakami sifatida ishlagan. Keyinchalik sudya Maykl Oliver aybini tan oldi: “Biz hammamiz, shu jumladan men ham ushbu vaziyatni to‘g‘ri baholay olmadik. Biz o‘sha vaziyatda ofsayd qayd etib Pikfordni maydondan chetlatishimiz mumkin edi”.
● VARda ishlagan Kut ishtirok etgan yana bir epizod o‘tgan mavsumda yuz bergan. O‘shanda Klopp “Arsenal” darvozasiga belgilanmagan penaltidan g‘azablangandi. PGMOL rahbari Xovard Uebb o‘sha paytda hakamlar xatoga yo‘l qo‘yganini tan oldi.
Kut 2018-yildan beri Premyer Ligada, 2020-yildan beri FIFA’da hakam sifatida faoliyat olib bormoqda. Devid 16 yoshidan hakamlik qiladi, hozir u 42 yoshda. Uning faoliyatidagi eng muhim bahs 2023-yilgi“Manchester Yunayted” va “Nyukasl” o‘rtasidagi Liga kubogi finali (2:0) hisoblanadi.
Angliyadan tashqarida ham kam ishlagan. U Yaponiya Ligasi o‘yinlari, shuningdek, Chempionlar Ligasi saralashidan o‘rin olgan “Slovan” — “Dinamo Batumi” o‘yinida ishtirok etgan, Millatlar Ligasida esa Armaniston — Estoniya uchrashuvini boshqargan.
Endi ushbu ro‘yxat kengayishiga umid bog‘lash qiyin. Katta ehtimol bilan hakam qilgan ishlari uchun uzoqroq muddatga chetlatilishi mumkin.
“Skauzer” (Scouser) – bu birinchi navbatda, Angliyaning Liverpul shahridan kelgan odamlar uchun ishlatiladigan noformal atama. Bu so‘z Liverpulning o‘ziga xos lahjasi va madaniyatiga tegishli bo‘lib, shahar aholisi orasida o‘ziga xos aksent va nutq uslubi bilan ajralib turadi.
Bu atama ba’zan hazil yoki do‘stona muhitda ishlatiladi. Biroq, ba’zi hollarda bu so‘z salbiy ma'noda ham ishlatilishi mumkin.
Izoh (0)