Fransiya prezidenti Emmanuel Makron respublika parlamentining ishonchsizlik votumidan so‘ng hukumat iste’fosini qabul qildi. Bu haqda Yelisey saroyi xabar berdi.
Mamlakat bosh vaziri Mishel Barne kabinetiga ishonchsizlik votumi 4-dekabr kuni qabul qilingan edi. Ishonchsizlik votumiga 2025-yilgi byudjetni muvofiqlashtirish jarayonida mamlakat siyosiy kuchlari o‘rtasidagi kelishmovchiliklar sabab bo‘lgan.
“Mishel Barne hukumat aʼzolari bilan birgalikda yangi hukumat tayinlangunga qadar joriy masalalar hal etilishini taʼminlaydi”, deyiladi xabarda.
Barne kabineti sentyabr oyining ikkinchi yarmida tuzilgan edi. Milliy assambleyaga o‘tkazilgan saylovlardan so‘ng, Makronga yangi hukumat rahbarini tayinlash uchun deyarli uch oy vaqt kerak bo‘ldi. Saylov natijalariga ko‘ra, birorta ham partiya parlamentda ko‘pchilik o‘rinni qo‘lga kirita olmagan edi.
Beshinchi Respublika konstitutsiyasiga ko‘ra, prezident iyul oyida bo‘lib o‘tgan so‘nggi saylovlardan bir yil o‘tib yangi parlament saylovlarini tayinlashi mumkin. Bu 1962-yilda Fransiyaning 19-prezidenti Jorj Pompidu hukumati iste’foga chiqarilganidan keyingi ikkinchi bunday holat.
Euronews nashri avvalroq Fransiya Milliy assambleyasi bosh vazir rahbarligidagi hukumatga ishonchsizlik votumi uchun ovoz bergani haqida xabar qilgandi. Rezolyutsiyani 557 nafar deputatdan 331 nafari qo‘llab-quvvatlagan.
Ishonchsizlik votumi masalasini dastlab “Yangi xalq fronti” so‘l koalitsiyasi ko‘tardi, so‘ngra byudjet loyihasi bo‘yicha kelishmovchiliklar tufayli o‘ta o‘ng “Milliy birlashma” o‘z tashabbusi bilan chiqdi.
Mishel Barne o‘z nutqida hukumatiga ishonchsizlik bildirilishi “jiddiy oqibatlarga” olib kelishini ta’kidladi. Bosh vazir fransuzlarning “xarid qobiliyati pasayishi” va “yangi politsiyachilar hamda harbiylarni yollash imkoniyati yo‘qolishi” haqida gapirdi.
Izoh (0)