O‘zbekiston VisaGuide Passport Index pasport indeksida 2024-yil yanvar holatiga ko‘ra, 128-o‘rinni egalladi.
Qayd etilishicha, O‘zbekiston pasporti mamlakat fuqarolariga 31 davlatga vizasiz sayohat qilish imkonini beradi, 19 davlat o‘zbekistonliklarga elektron viza va 32 davlat kelganida vizalar beradi. O‘zbekiston pasporti egalari 144 davlatga kirish uchun sayohat qilishdan oldin viza olishi kerak.
Markaziy Osiyo davlatlari orasida Qozog‘iston pasporti eng yaxshi ko‘rsatkichga ega — 110-o‘rin. Qirg‘iziston pasporti 132-o‘rin, Tojikiston pasporti 140-o‘rin va Turkmaniston pasporti 167-o‘rinda qayd etilgan.
2023-yilgi reytingning mutlaq yetakchisi Ispaniya pasporti bo‘ldi. Ikkinchi o‘rinda Germaniya pasporti. Kuchli beshlikni Singapur, Italiya va Fransiya pasportlari yakunlaydi.
Reytingning so‘nggi o‘rinlarini Iroq, Pokiston, Suriya, Afg‘oniston, Somali kabi davlatlarning pasporti egallagan.
Henley & Partners xalqaro konsalting kompaniyasi tomonidan tuzilgan dunyoning eng kuchli pasportlari reytingida O‘zbekiston 2023-yilda 78-o‘rinni egallagan edi. Respublika pasportiga ega bo‘lganlar 59 ta davlatga vizasiz yoki soddalashtirilgan tartibda kirish imkoniga egaligi ta’kidlangandi. 2022-yilning aprelida e’lon qilingan Passport Index reytingda O‘zbekiston pasporti 63-o‘rinni, 2021-yilda esa 86-o‘rinni egallagandi.
Izoh (0)