Tadbirkor Pavel Durov birinchi marta Parij sudida Telegram messenjerida moderatsiya yetarli bo‘lmagan ish bo‘yicha so‘roq qilindi. Bu haqda AFP’ga tayanib 20Minutes xabar berdi.
So‘roq 6-dekabr kuni bo‘lib o‘tdi. Durov o‘z advokatlari David-Olive Kaminski va Kristof Ingren bilan sudga keldi. Biznesmen jurnalistlarga batafsil izoh berishdan o‘zini tiyib, faqat fransuz adolat tizimiga ishonch bildirish bilan cheklandi.
Advokat Kaminski Durovning Telegram orqali sodir etilgan jinoyatlarga aloqadorligi haqidagi ayblov pozitsiyasini bema’ni deb baholadi.
Durovning hibsga olinishi
Telegram asoschisi 24-avgust kuni Ozarbayjondan Parijga shaxsiy samolyotida borganda Le Burje aeroportida qo‘lga olindi. U fransuz huquq-tartibot idoralari xodimlari bilan Telegram’da kiber va moliyaviy jinoyatlar masalalarida hamkorlik qilishdan bosh tortganlikda ayblandi.
Parij sudi uni platformaga aloqador avval e’lon qilingan 12 ta huquqbuzarlikdan 6 tasida, jumladan, hukumat bilan hamkorlik qilishdan bosh tortishda, bolalar pornografiyasini tarqatishda, narkotrafikda ishtirok etishda, shuningdek, uyushgan guruh tarkibidagi firibgarlikda aybladi. 29-avgust kuni u 5 million yevro miqdorida garov to‘lash, haftada ikki marta politsiya uchastkasiga kelish, Fransiyani tark etmaslik sharti bilan ozod qilindi.
Liberation nashrining yozishicha, Durov so‘roq paytida Fransiya kontrrazvedkasi bilan maxsus aloqa kanali borligini, bu orqali bir necha teraktlarning oldi olinganini aytgan. Shu bilan birga, manbalar gazetaga ma’lum qilishlaricha, 2013-yildan 2024-yilgacha Fransiya politsiyasi Telegram’dan 2460 ta so‘rovga javob olmagan.
Sentyabr oyida Telegram nafaqat Fransiya, balki boshqa mamlakatlarning huquq-tartibot idoralari bilan hamkorlik qila boshlagani haqida xabar berilgan edi.
Xususan, Yevropa ittifoqining nomi oshkor etilmagan davlati yuzga yaqin qotilliklar muhokama qilingan Telegram guruhi bo‘yicha so‘roviga javob olishga muvaffaq bo‘lgan.
Fransiyada esa messenjer voyaga yetmaganlar milliy politsiya boshqarmasi (Ofmin) tomonidan bir nechta jinoiy tergovlarda berilgan so‘rovlarga javob berib, aksar gumondorlarni aniqlashi mumkin bo‘lgan materiallarni taqdim etgan.
Izoh (0)