Kiprda suriyalik noqonuniy muhojirlar sonining sezilarli darajada ortishi sababli Yevropa Ittifoqi Livan bilan migratsiya kelishuvini ishlab chiqayotganini ma’lum qildi. Bu haqda Kipr prezidenti Nikos Xristodulidis axborotiga tayanib, Deutsche Welle xabar berdi.
Xristodulidis Kiprga qochqinlar kirmasligi uchun Livanga ular bilan shug‘ullanishda yordam berishini ta’kidlagan.
Kipr rahbari 2-may kuni Yevropa komissiyasi prezidenti Ursula fon der Leyen bilan Livanga borib, yordam paketining aniq mazmunini e’lon qilishini aytgan. Xristodulidis bu moliyaviy yordam Livan hukumatini, shu jumladan, armiyani qo‘llab-quvvatlash choralarini o‘z ichiga olishini aytgan.
Kipr prezidenti o‘z mamlakatidagi vaziyatni keskin deb atagan. Shuningdek, suriyalik qochqinlarni ortiq qabul qila olmasligini ta’kidlagan. U barcha suriyaliklar Yevropa Ittifoqidan boshpana olishi kerakmi yoki yo‘qligini muhokama qilish maqsadida yordam so‘rab Bryusselga murojaat qilgan.
Biz Suriyaning ayrim hududlarini so‘zsiz xavfsiz deb tasniflashga chaqiramiz, — dedi u.
Livandan 160 km uzoqlikda joylashgan O‘rta Yer dengizidagi orolga joriy yil boshidan buyon 4 mingga yaqin muhojir yetib kelgan. 2023-yilning birinchi choragida bu ko‘rsatkich 78 kishini tashkil etgan. Kiprdagi qochqinlar lagerlari to‘lgan va rasmiylar suriyaliklarning boshpana so‘rash arizalarini ko‘rib chiqishni to‘xtatgan. 5,3 million aholiga ega va o‘z tarixidagi eng og‘ir moliyaviy inqirozni boshidan kechirayotgan Livanda 1,5 milliondan ortiq suriyalik qochqin yashamoqda.
Izoh (0)