Германия миграция идоралари Сурия фуқароларининг бошпана сўраш аризаларини кўриб чиқишни вақтинча тўхтатди. Бу маълумотни ГФР ИИВ матбуот котиби Sonyа Кок тасдиқлади.
“БАМФ ҳар бир ҳолатни жуда синчковлик билан кузатиб боради. Бу келиб чиқиш мамлакатидаги вазиятни баҳолашни ҳам ўз ичига олади”, деди Кок.
Унинг таъкидлашича, агар ариза берувчининг мамлакатидаги вазият ноаниқ бўлса, миграция идораси бошпана бериш тўғрисидаги қарорни кечиктириш ҳуқуқига эга. Кокга кўра, айнан ушбу ҳолат ҳозир Сурияга тегишли. Унинг баҳолашига кўра, амалда сурияликларнинг аризалари энди “пастга сурилиб, бошқа бошпана сўровларига устуворлик берилади”.
Нашрнинг аниқлик киритишича, БАМФ Сурия фуқароларининг аризалари бўйича бошпана бериш бўйича бирон-бир қарор қабул қилишни тўхтатган. Вазирлик вакили мамлакатдаги вазиятни чалкаш ва олдиндан айтиб бўлмайдиган ҳолат деб атади.
ИИВ вакилининг таъкидлашича, назарий жиҳатдан Германияда истиқомат қилаётган сурияликларнинг мақоми бекор қилиниши ёки узайтирилмаслиги мумкин. Бундай ҳолатда улар Германияни тарк этишлари керак бўлади. Бироқ бу Суриядаги вазиятнинг “қисқа муддатли истиқболда” ривожланишига боғлиқ.
“Суриядаги вазият охир-оқибат қочоқларнинг янги кўчишига олиб келадими ёки аксинча, вазият барқарорлашадими, узоқ муддатли истиқболда кўчиб кетган шахслар ҳамда қочоқлар учун ватанига қайтиш имконияти пайдо бўладими, ҳозирча номаълум”, деб таъкидлади Германия ТИВ вакили.
БАМФ томонидан қабул қилинган қарор сурияликлардан бошпана сўраб кўриб чиқилаётган 47 мингта аризага тааллуқли. Шундан 46 мингга яқини дастлабки аризалардир.
Германия ИИВ маълумотларига кўра, 2024 йил октябрь ҳолатига кўра мамлакатда қарийб 975 минг нафар Сурия фуқароси бўлган.
Австрия депортацияга тайёрланмоқда
Сурияликларнинг бошпана сўраб берган аризалари бўйича худди шундай қарор 9 декабрь куни Австрия ҳукумати томонидан қабул қилинди. Мамлакат ИИВ маълумотларига кўра, 7300 га яқин дастлабки аризаларнинг кўриб чиқилиши тўхтатилган. Шунингдек, илгари маъқулланган барча аризалар қайта текширилиши лозим. Сурия оилаларини бирлаштириш дастури ҳам тўхтатилади.
“Шу муносабат билан, мен вазирликка Сурияга репатриация ва депортация қилиш бўйича тартибли дастур тайёрлашни топширдим”, деди Австрия ИИВ раҳбари Герхард Карнер.
Суриялик қочқинларнинг бошпана сўраб берган мурожаатларини кўриб чиқишни тўхтатиш тўғрисидаги қарорларни Буюк Британия, Дания, Италия, Нидерландия, Норвегия, Швейцария ва Швеция каби бошқа Европа мамлакатлари ҳам қабул қилган ёки қабул қилишга тайёрланмоқда. Франция ҳукумати ҳам ҳам ушбу лойиҳани истисно этмаган.
Изоҳ (0)