Amerikaning Alyaska shtatiga qarashli Andrean orollari yaqinida 6,1 magnitudali zilzila yuz berdi. Bu haqda Yevropa-O‘rta Yer dengizi seysmologik markazi xabar berdi.
Qurbonlar va vayronagarchiliklar haqida ma’lumotlar yo‘q. Sunami xavfi e’lon qilinmagan.
Mutaxassislarning qo‘shimcha qilishicha, zilzila episentri taxminan 4,4 ming kishi istiqomat qiluvchi Unalaska shahridan 789 km janubi-g‘arbda joylashgan. Seysmik hodisa manbai 10 km chuqurlikda joylashgan.
Avvalroq AQSH Geologiya xizmati Kaliforniya shtati shimolida 7 magnitudali zilzila sodir bo‘lgani haqida xabar bergan edi.
San-Fransisko ko‘rfazi hududida zilzilalar qayd etilgan. Kaliforniya va Oregon shtatlarining qirg‘oqbo‘yi aholisiga quyidagicha ogohlantirish yuborilgan: “Sizning yaqiningizdagi qirg‘oqqa bir qator kuchli to‘lqinlar va shiddatli oqimlar urilishi mumkin. Siz xavf ostisiz. Qirg‘oq suvlaridan tezda uzoqlashing”.
Geologiya xizmati ma’lumotlariga ko‘ra, zilzila 5-dekabr kuni mahalliy vaqt bilan soat 10:44 da (Toshkent vaqti bilan kechasi 23:44 da) yuz bergan, uning episentri Gumbold okrugidan taxminan 10 milya (16 kilometr) janubi-g‘arbda joylashgan.
AQSHda kuzatilgan so‘nggi kuchli zilzilalar
2014-yilning yozida Kaliforniyada 6 magnitudali zilzila sodir bo‘ldi. Bu o‘sha paytdagi so‘nggi 25 yildagi eng kuchli zilzila edi. Uning episentri Amerika Kanoni shahridan 6 kilometr shimoli-g‘arbda va Napa shahridan 9 kilometr janubda joylashgan.
2019-yil yozida 6,4 magnitudali zilzila Los-Anjelesdan 196 kilometr uzoqlikda qayd etilgan, zilzilalar Las-Vegasda sezilgan. U 1994-yildan beri Kaliforniyaning janubida eng kuchlisi bo‘lgandi.
Izoh (0)