Ukraina tashqi ishlar vaziri Andrey Sibiga rossiyalik hamkasbi Sergey Lavrov nutqi boshlanishidan oldin Yevropada xavfsizlik va hamkorlik tashkiloti yalpi majlislar zalini tark etdi.
Bundan oldin nutqining yakunida Sibiga Lavrovni “harbiy jinoyatchi” deb atadi.
Avvalroq Polsha va Chexiya TIV rahbarlari Radoslav Sikorskiy hamda Yan Lipavskiylar Lavrovning nutqiga quloq solmasliklarini aytib, zalni tark etishgandi.
Sikorskiy Lavrovni sammitga Rossiyaning Ukrainaga bostirib kirgani haqida yolg‘on tarqatish uchun kelganlikda aybladi.
Maltaning Rossiyadagi elchixonasi YXHT Vazirlar kengashi yig‘ilishini 5-6-dekabr kunlari ushbu mamlakatda o‘tkazish to‘g‘risidagi qaror “barcha a’zolarga, shu jumladan Rossiyaga ham tegishli”ligini tasdiqlagan.
Lavrov Yevropa ittifoqiga oxirgi marta Rossiya-Ukraina urushi boshlanishidan oldin – 2021-yil dekabrida tashrif buyurgan edi. O‘shanda YXHT Vazirlar kengashi yig‘ilishi Shvetsiya poytaxti Stokgolmda bo‘lib o‘tgan. 2022-yil fevral oyidan boshlab Lavrov Yevropa ittifoqining shaxsiy sanksiyalariga duchor bo‘lgan, xususan, uning YIdagi aktivlarini muzlatilgan.
2023-yil fevral oyi boshida Avstriya TIV rahbari Aleksandr Shallenberg mamlakat parlamentida so‘zlagan nutqida YXHT tadbirlaridagi rossiyalik vakillar sanksiyaga duchor bo‘lgan taqdirda ham kirish huquqiga egaligini aytgan.
2023-yil noyabr oyida Lavrov Yevropa ittifoqiga aʼzo bo‘lmagan, ammo NATO tarkibiga kiruvchi Shimoliy Makedoniyada YXHTga aʼzo davlatlar tashqi ishlar vazirliklari rahbarlarining yig‘ilishida ishtirok etgan edi. Shu sababli Latviya, Litva, Estoniya, Polsha va Ukraina vakillari Skopyedagi tadbirga kelishdan bosh tortgan.
2022-yilda YXHTga raislik qilgan Polsha Lavrovni Lodzda bo‘lib o‘tgan YXHT Vazirlar kengashi yig‘ilishida ishtirok etishi uchun mamlakatga kiritishdan bosh tortgan.
Izoh (0)