Donor davlatlar Bryusselda bo‘lib o‘tgan anjumanda Suriya xalqi va qo‘shni davlatlardagi suriyalik qochqinlarga yordam berish uchun yana 8,1 milliard dollar ajratishga kelishib oldi. Bu haqda Associated Press xabar berdi.
Xabarga ko‘ra, grant shaklidagi 4milliard dollar 2024-yilda, yana 1,3 milliard dollar keyinroq ajratiladi.
Yana 2,5 milliard yevro kredit shaklida beriladi, — deya qo‘shimcha qilgan nashr.
Germaniya TIV mamlakat yuqoridagi summadan 1,1 milliard dollar ajratishini ma’lum qilgan. Mazkur mablag‘ 2023-yil fevralida mintaqada sodir bo‘lgan va 59 ming kishini, jumladan, Suriyadagi 6 ming kishining hayotiga zomin bo‘lgan zilzila oqibatlarini bartaraf etishga sarflanadi.
Suriyada fuqarolik urushi 2011-yilda boshlangan. Janglarda 500 mingga yaqin odam halok bo‘lgan, 23 millionlik mamlakat aholisining yarmiga yaqini uylarini tashlab ketishga majbur bo‘lgan. Hozirda qo‘shni Turkiya, Livan va Iordaniyada 5,7 million suriyalik qochqin bor. Bashar al-Assad rejimi va uning muxoliflari o‘rtasidagi mojaroning mamlakat ichidagi siyosiy yechim istiqboli hali ko‘rinmayapti.
Avvalroq Yevropa Ittifoqining sakkiz mamlakati – Avstriya, Gretsiya, Daniya, Italiya, Kipr, Malta, Polsha va Chexiya Suriyadagi vaziyatni qayta ko‘rib chiqishga chaqirgan. Ularning fikriga ko‘ra, mamlakatda to‘liq siyosiy barqarorlikka hali erishilmagan bo‘lsa-da, Suriyaning ayrim hududlarini qochqinlar qaytishi uchun xavfsiz deb hisoblash mumkin.
Biroq xalqaro gumanitar tashkilotlar, masalan, Xalqaro Qizil Xoch qo‘mitasi, suriyalik qochqinlarning ommaviy qaytishi uchun hozircha sharoit yo‘qligini ta’kidlagan. Germaniya rasmiysi Bryusseldagi anjumanda hukumat mamlakatdan qochgan suriyaliklarni vataniga majburan jo‘natishga qarshi ekanini aytgan.
Biz aniq aytishimiz kerak: Suriyaga qaytish mamlakatdagi vaziyat xavfsiz bo‘lgandagina mumkin bo‘ladi va faqat ixtiyoriy asosda amalga oshirilishi mumkin, — deya uning so‘zlarini keltiradi dpa.
Izoh (0)