Yevroparlament fon der Lyayen boshchiligidagi Yevropa komissiyasining yangi tarkibini tasdiqladi.
Strasburgda bo‘lib o‘tgan yalpi majlisda Yevroparlament aʼzolari ushbu lavozimga qayta saylangan Ursula fon der Lyayen boshchiligidagi Yevropa komissiyasining yangi tarkibini, shuningdek, Yevropa ittifoqining Oliy vakili etib estoniyalik Kaya Kallasni ko‘pchilik ovoz bilan qo‘llab-quvvatladilar.
Ovoz bergan 688 deputatdan 370 nafari yangi komissiyani qo‘llab-quvvatladi, 282 nafari qarshi, 36 nafari betaraf qoldi.
Endilikda fon der Lyayen komissiyasi Yevropa ittifoqi kengashidan rasmiy ruxsat olishi kerak, shundan so‘ng u 1-dekabrdan ish boshlashi mumkin.
Sentyabr oyida fon der Lyayen yangi besh yillik muddat uchun YI tarkibi bo‘yicha o‘z taklifini taqdim etgan edi. Yevrokomissiya rahbarining talabiga ko‘ra, uning yangi tarkibi 40 foiz ayollardan iborat bo‘ladi va ular oltita vitse-prezidentlik lavozimidan to‘rttasini oladi.
Yevropa diplomatiyasi rahbari lavozimini Estoniya vakili Kaya Kallas egallaydi. Avvalroq u Yevroparlament a’zolari oldidagi chiqishida Ukrainani qo‘llab-quvvatlash, Rossiya va Xitoyga qarshi turishni o‘zining ustuvor yo‘nalishlari deb atagan edi.
Yangi Yevropa komissiyasiga nomzodlar qatorida Yevropa ittifoqining farovonlik va sanoat strategiyasi bo‘yicha bo‘lajak vitse-prezidenti Stefan Sejurne, texnologik suverenitet, xavfsizlik va demokratiya bo‘yicha vitse-prezidentlar Xenna Virkunnen hamda Yashil, adolatli va raqobatbardosh o‘tish bo‘yicha Riber Teresa, Yevrokomissiyaning ishchi kuchi, ko‘nikma va tayyorgarlik masalalari bo‘yicha vitse-prezidenti Roksana Minzatu, birdamlik va islohotlar bo‘yicha vitse-prezident Rafael Fittolar bor.
Marosh Shefchovich savdo va iqtisodiy xavfsizlik bo‘yicha, Valdis Dombrovskis iqtisodiyot va samaradorlik bo‘yicha, Oliver Varhelli sog‘liqni saqlash bo‘yicha yevrokomissar lavozimlarini egallaydi.
Belgiyaning sobiq tashqi ishlar vaziri Aja Labib inqirozlarni boshqarish bo‘yicha Yevropa komissari lavozimiga, Rossiyaga qarshi kayfiyati bilan tanilgan Yevroparlament deputati Andrius Kubilius esa Mudofaa va koinot bo‘yicha Yevropa komissarligiga tayinlanadi.
Izoh (0)