Yevropa ittifoqi Ukrainaga makromoliyaviy yordam ko‘rsatish shartlarini, jumladan, Rossiyaning muzlatilgan aktivlaridan tushgan mablag‘lardan 35 milliard yevro miqdoridagi kredit ajratishning shartlarini eʼlon qildi.
Uni olish uchun Ukraina Yevropa ittifoqining “samarali demokratik mexanizmlarini qo‘llab-quvvatlashi va hurmat qilishi” kerak bo‘ladi.
Hujjatga ko‘ra, bu talab ko‘ppartiyaviylik parlament tizimini qo‘llab-quvvatlash va qonun ustuvorligini ta’minlash zarurligini o‘z ichiga oladi. Bundan tashqari, Ukraina hukumati inson huquqlari, jumladan, ozchiliklar huquqlariga rioya etilishini kafolatlashi kerak. Qayd etilishicha, bu faqat dastlabki shartlar bo‘lib, ularning bajarilishi Yevropa komissiyasi va Yevropa tashqi harakatlar xizmati tomonidan nazorat qilinadi.
“Agar komissiya ushbu moddaning 1-bandida ko‘rsatilgan shart bajarilmagan deb topsa, u kredit to‘lovlari va boshqa yordam ko‘rsatishni to‘xtatadi”, deyiladi Yevropa ittifoqining rasmiy jurnalida e’lon qilingan materialda.
Aniqlik kiritilishicha, kredit ham bir qator siyosiy shartlarga bog‘liq bo‘lib, ular Yevropa ittifoqi va Ukraina o‘rtasidagi anglashuv memorandumida belgilab qo‘yiladi. Bundan tashqari, boshqa donorlar bilan ikki tomonlama kreditlarni muvofiqlashtirish va bir-birini to‘ldirishni ta’minlash choralarini ko‘rish tavsiya etiladi.
22-oktyabr kuni Yevroparlament Ukrainaga Rossiyaning muzlatilgan aktivlaridan tushgan daromaddan foydalangan holda qaytariladigan kredit berishni qo‘llab-quvvatladi. 35 milliard yevro miqdoridagi kredit 2025-yildan boshlab bir necha transhlarda to‘lanishi kutilmoqda.
Yevropa komissiyasi 2025-yilda Ukrainaning tashqi moliyalashtirish ehtiyojlarini 41,6 milliard dollarga baholadi, bu kutilganidan 15,6 milliard dollarga yuqori. Fransiya prezidenti Emmanuel Makron Yevropa Ittifoqining Ukraina uchun kreditlar bo‘yicha xarajatlarini oshirishga qarshi chiqdi.
Izoh (0)