“Nazarimda, Rossiyaga nisbatan bosimlar Putin hokimiyatdan ketganidan keyin ham to‘xtamaydi”, deb yozadi siyosatshunos Kamoliddin Rabbimov Telegram’dagi kanalida.
Kamoliddin Rabbimovning fikricha, Putin imperiyachilik orzulari oqibatida Rossiya qudratiga jiddiy zarba berib qo‘ydi.
Yevropa parlamenti ko‘pchilik ovoz bilan Rossiyani “terrorizm homiysi bo‘lgan davlat” (gosudarstvo-sponsor terrorizma) deb tan olibdi. Bu qaror, hozircha ramziy-siyosiy ma’noga ega va real huquqiy oqibatlari mavjud emas. Lekin bu katta qadamlarning boshlanishi bo‘lishi mumkin. Yevroparlament Yevropa komissiyasi va kengashini Rossiyaga nisbatan “terror homiysi bo‘lgan davlat” sifatida muomalada bo‘lishga chaqirgan. Ya’ni, rasmiy Moskvani to‘liq ixotalash tavsiya qilingan.Avvalroq Kamoliddin Rabbimov Ukraina va Rossiya o‘rtasidagi urush Markaziy Osiyo mintaqasi uchun tarixiy bonus bo‘lishi mumkinligini aytgandi.AQSHda ham bir necha oydan beri Rossiyani “terrorizm homiysi bo‘lgan davlat” sifatida baholash chaqiriqlari bor. Lekin Bayden ma’muriyati bu taklifga qarshi. Chunki AQSH qonunchiligiga ko‘ra, Vashington qaysi bir davlatni “terrorizm homiysi” deb tan olsa, unga nisbatan real huquqiy mexanizmlar ishlashi kerak. Rossiyaga nisbatan shunday mexanizmlarni joriy qilishni oqibatlari global darajada katta o‘zgarishlarga olib keladi.
Misol uchun, Rossiya BMTning Xavfsizlik kengashi doimiy a’zosi. Agar Rossiya “terrorizm homiysi bo‘lgan davlat” deb tan olinsa, BMT Xavfsizlik kengashidan chiqarilishi nazarda tutilishi kerak. Buning uchun, Xavfsizlik kengashining qolgan doimiy a’zolari ham bunga rozilik berishi lozim. Qolaversa, Rossiya bilan AQSH va g‘arb davlatlarining diplomatik munosabatlar deyarli uzilishi yoki juda pasayishi kerak bo‘ladi.
Nazarimda, Rossiyaga nisbatan real bosimlar Putin hokimiyatdan ketganidan keyin ham to‘xtamaydi. Rossiyani qo‘lidan yadro qurolini olib qo‘yish, BMT Xavfsizlik kengashidagi uni veto huquqini olish tashlashga intilish ham kuchayadi. Putin Rossiyani qaytadan imperiyaga aylantirishni orzu qilib, uni bor qudratiga ham tarixiy zarba berib qo‘ydi. Rossiya bu vaziyatdan 2021-yildagi kabi jamuljam resurslar va qudrat bilan chiqa olmaydi, albatta, zaif yoki o‘ta zaif holatda chiqadi.
Kamoliddin Rabbimov, siyosatshunos.
“Hozir Markaziy Osiyo mintaqasi uchun yangi davr kirib kelmoqda. Ayni damda jahondagi eng yirik urush postsovet hududida (Ukraina va Rossiya o‘rtasida — tahr.) bo‘lib o‘tmoqda. Avvaliga bu urush ko‘pchilikni qo‘rqitdi. Ammo hozirga kelib bu voqea Markaziy Osiyo mintaqasining geosiyosiy jihatdan mustaqil bo‘lishida tarixiy bonusga aylanayotganini ko‘rish mumkin”, – degan edi Kamoliddin Rabbimov Markaziy Osiyo ekspertlari forumida.
Izoh (0)