Yevrokomissiyaning amaldagi rahbari Ursula fon der Lyayen aʼzo bo‘lgan Yevropa xalq partiyasi (YXP) Yevropa parlamentiga saylovlarda birinchi o‘rinni egalladi. Bu haqda “TASS” xabar berdi.
Saylovning dastlabki natijalarida YXP o‘z ustunligini saqlab qolgan holda Yevroparlamentda 181 ta o‘rin oldi. Ikkinchi o‘rin (135 ta) sotsialistlar va demokratlarga, uchinchi o‘rin “Yangi Yevropa” partiyasiga nasib etdi.
“Bugun Yevropa xalq partiyasi uchun yaxshi kun. Biz eng kuchli partiyamiz, boshqalar bilan birga o‘ng va so‘l siyosatchilarga qarshi qal’a quramiz. Ularni to‘xtatamiz”, — Ursula fon der Lyayen.
U Ukrainani qo‘llab-quvvatlaganlar bilan hamkorlik qilishini aytdi. Dastlabki hisob-kitoblarga ko‘ra, o‘ng partiyalar o‘z pozitsiyalarini mustahkamlagan, jumladan, “Shaxsiyat va demokratiya” hamda “Konservatorlar va islohotchilar” fraksiyasi yangi Yevropa parlamentida 720 o‘rindan 133 tasini oladi.
Yevroparlamentning yangi tarkibidagi o‘ng qanot fraksiyalarining ulushi 16,7 foizdan 18,5 foizgacha oshadi. Shu bilan birga, yana 51 o‘rin rasmiy fraksiyalarga a’zo bo‘lmagan, xususan, may oyida “Shaxsiyat va demokratiya” fraksiyasidan chiqarib yuborilgan “Germaniya uchun muqobil” partiyasini o‘z ichiga olgan deputatlarga beriladi. Yevroparlament prezidenti Roberta Metsola ta’kidlaganidek, “bular hali ham o‘zgarishi mumkin bo‘lgan dastlabki natijalar”.
Yevroparlamentga saylovlar 6—9-iyun kunlari Yevropa Ittifoqining barcha davlatlarida bo‘lib o‘tdi. Ovoz berish har bir davlatning milliy qonunchiligiga muvofiq amalga oshirildi: Niderlandiya 6-iyunda, Irlandiya va Chexiya 7-iyunda, Italiya, Latviya, Malta, Slovakiyada 8-iyunda ovoz berildi, boshqa davlatlarda saylov 9-iyun kuni bo‘lib o‘tdi.
Izoh (0)