Yevroparlament Venesuela prezidenti Nikolas Maduroni hibsga olishga xalqaro order berish va muxolifat yetakchisi Edmundo Gonsales Urrutiani davlat rahbari sifatida tan olishga chaqirdi.
Bu haqda parlamentning Strasburgdagi yalpi majlisida qabul qilingan rezolyutsiyada aytiladi.
“Biz Yevropa Ittifoqi va aʼzo davlatlarni Nikolas Maduroni hibsga olish uchun xalqaro order berishni so‘rashga chaqiramiz”, deyiladi hujjat matnida.
Yevroparlament deputatlari, shuningdek, Venesuela Milliy saylov kengashi aʼzolariga nisbatan sanksiyalarni tiklashni va mamlakat rasmiylariga nisbatan cheklovlarni kuchaytirishni talab qilishdi.
Bundan tashqari, Yevroparlament deputatlari Gonsales Urrutia Venesuelaning qonuniy prezidenti sifatida tan olinganini e’lon qildi. Ular Yevropa Ittifoqining barcha davlatlarini rasman ushbu pozitsiyani egallashga va “uning 2025-yil 10-yanvarda lavozimga kirishini ta’minlash uchun hamma narsani qilishga” chaqirdi.
28-iyul kuni Venesuelada prezidentlik saylovlari bo‘lib o‘tdi. Milliy saylov kengashi protokollarning deyarli 97 foizini qayta ishlagandan so‘ng fuqarolarning 51,95 foizi Maduroga, 43,18 foizi Gonsales Urrutiaga ovoz berganini e’lon qildi.
Izoh (0)