Yevroparlament a’zolari 22-noyabr kuni Strasburgda bo‘lib o‘tgan yalpi majlisda Rossiyani “terrorizmga homiylik qiluvchi va terrorizm vositalaridan foydalanadigan davlat” deb tan oluvchi rezolyutsiyaga ovoz berdi. Bu haqda Reuters xabar berdi.
Rezolyutsiya 494 ta ovoz bilan qabul qilingan, 58 nafar deputat ushbu hujjatga qarshi ovoz bergan, 44 nafari esa betaraf qolgan. Hujjatda nafaqat Ukrainadagi urush bilan bog‘liq ayblovlar, balki Rossiyaga qarshi boshqa ayblovlarni ham bor. Rezolyutsiya, shuningdek, Yevropa Ittifoqi amalga oshirishi kerak bo‘lgan reaksiya to‘plamini taklif qiladi.
Shu tariqa, Yevroparlament YeI Kengashini sanksiyaga kiritilgan shaxslar ro‘yxatini kengaytirishga, barcha Yevropa Ittifoqiga nomzod davlatlarni va potensial nomzodlarni YeIning sanksiyalar siyosatiga qo‘shilishga chaqiradi.
Yevroparlament Yevropa Komissiyasi va Yevropa Ittifoqiga a’zo davlatlarni “Rossiyaga sanksiyalarni chetlab o‘tishga yordam berishga harakat qilayotgan davlatlarga qarshi mumkin bo‘lgan choralarni ko‘rib chiqishni” taklif qiladi. Yevroparlament deputatlarining tavsiyalari orasida “Rossiya yoqilg‘i va uran importiga zudlik bilan va to‘liq embargo qo‘yish, shuningdek, ‘Shimoliy oqim 1’ va ‘Shimoliy oqim 2’ gaz quvurlaridan butunlay voz kechish” o‘rin olgan.
18-noyabr kuni Yevroparlament Rossiyani “terrorizm homiysi ”deb tan olish haqidagi rezolyutsiyani tayyorlagandi. Siyosiy guruhlari o‘rtasida to‘rt soat davom etgan muzokaralardan so‘ng rezolyutsiya matni bo‘yicha kelishuvga erishilgan. Ukraina AQSHni bir necha bor Rossiyani “terrorizm homiysi” sifatida tan olishga chaqirgan. Vashington hali bunday qadam tashlashga shoshilmayapti, biroq Ukraina tashqi ishlar vaziri Dmitriy Kuleba bir necha bor “yo‘q” deyilgani, ammo oxir-oqibat qaror qabul qilinganini ta’kidladi.
Izoh (0)