Politico: Ursula fon der Lyayen YI hokimiyatini qo‘lga oldi

Yevrokomissiya rahbari Ursula fon der Lyayen Yevropa ittifoqi siyosati ustidan cheksiz nazoratga ega bo‘ladi. Bu haqda Politico nashri xabar berdi.

Nashr mazkur xabarni u tayinlash uchun taqdim etgan jamoa tarkibi bilan izohlagan. Jurnalistlarga ko‘ra, “hokimiyatni egallab olish yakunlangan”.

“U hamma narsani yanada ko‘proq nazorat qiladi. Bunday bo‘lishini kim ham o‘ylagan edi”, deydi Politico’ning yevropalik rasmiy manbasi.

Nashr qayd etganidek, fon der Lyayen jamoasida birorta ham skeptik qolmagan. Yevrokomissiya rahbari o‘z jamoasi tuzilganini e’lon qilganida, u Yevroparlament va sheriklariga kimni qanday lavozimga tayinlayotganini aytishdan bosh tortgan.

Buning o‘rniga, u parlament rahbarlari bilan uchrashuvni tark etgan va to‘g‘ridan to‘g‘ri matbuot anjumaniga borgan, u yerda tafsilotlarni ochiqlagan. Politico’ga ko‘ra, qonunchilar uni parlamentga hurmatsizlikda ayblagan.