“Daryo” nashri 23-noyabrda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Zelenskiy ukrainaliklar “har qanday ssenariy”ga tayyor turishi kerakligini aytdi
Ukraina prezidenti Vladimir Zelenskiy Ukraina yangi hujumlarga uchragan taqdirda foydalanish uchun 4 mingdan ortiq yordam punktlari yaratilganini ma’lum qildi
Ukrainaga yangi raketa hujumlari sodir bo‘lgan taqdirda foydalanish uchun 4 mingdan ortiq “buzilmas punktlar” — uyali aloqa, internet, elektr va issiqlik ta’minoti bilan jihozlangan nuqtalar tayyorlab qo‘yildi. Bu haqda Ukraina prezidenti Vladimir Zelenskiy o‘z videomurojaatida ma’lum qildi.
“Aholini qo‘llab-quvvatlash bo‘yicha yangi “Buzilmas punktlar” loyihamizni butun mamlakat bo‘ylab ham joriy qilmoqdamiz. Shu kunning natijasi o‘laroq, 4 mingdan ortiq ana shunday punkt tayyorlandi. Yana ko‘p ishlar rejalashtirilgan”, — degan prezident.
Ukraina prezidenti shuningdek, bunday punktlarda “asosiy xizmatlar”ning barchasi — elektr, suv, issiqlik, birinchi tibbiy yordam qutisi, mobil aloqa va “kecha-yu kunduz ishlovchi mutlaqo bepul” internet mavjud bo‘lishini ta’kidladi. Bu punktlar maktablar, shifoxonalar, viloyat va tuman hokimliklari qoshida ishlaydi.
Ayni vaziyatda Zelenskiy ukrainaliklar “har qanday ssenariyga” tayyor turishi kerakligini qo‘shimcha qildi.
AQSH MRB bosqindan norozi rossiyaliklarni agentlikka yollamoqchi
AQSH Markaziy razvedka boshqarmasining razvedka xizmati boshlig‘i Devid Marlou boshqarma Ukrainadagi urushdan norozi rossiyaliklar bilan hamkorlik qilish niyatida ekanini aytdi. Bu haqda The Wall Street Journal Marlouning bayonotiga asoslanib xabar bermoqda.
Marlouning tushuntirishicha, urush boshlanishidan oldin Rossiya prezidenti o‘z mamlakatining kuchi Ukraina va NATOga ta’sir o‘tkaza olishi haqida gapirgan. “Ammo u birin-ketin hammasini boy berdi”, — deya qo‘shimcha qildi razvedka boshlig‘i.
“Biz butun dunyo bo‘ylab bunga (Ukrainadagi urushga) biz kabi qarshi bo‘lgan rossiyaliklarni qidirmoqdamiz ... Biz hamkorlikka tayyormiz”, — degan Marlou.
The Wall Street Journal qayd etishicha, razvedka boshlig‘ining so‘zlari MRB sobiq xodimlarining bayonotlariga mos keladi — ularda Rossiyaning Ukrainaga bosqini rossiyalik harbiylar, oligarxlar, biznesmenlar va urush boshlanganidan keyin Rossiyani tark etganlar orasidan yangi agentlarni yollash uchun qulay zamin yaratishi ta’kidlangan.
Ukrainada urush boshlanganidan keyin Rossiya va G‘arb davlatlari yuzlab diplomatlarni hududidan chiqarib yubordi. “RBK” hisob-kitoblariga ko‘ra, 2022-yilning yanvaridan avgustigacha diplomatik vakolatxonalarning 550 dan ortiq xodimi Rossiyaga qaytarilgan, ularning ba’zilari josuslikda gumon qilingan. Rossiyalik diplomatlarning aksariyati AQSH, Bolgariya va Polshadan chiqarib yuborilgan. Bunga javoban Rossiya ham 300 dan ortiq odamni chiqarib yubordi.
Yevroparlament Rossiyaga nisbatan yangi rezolyutsiyani qabul qildi
Yevroparlament a’zolari 22-noyabr kuni Strasburgda bo‘lib o‘tgan yalpi majlisda Rossiyani “terrorizmga homiylik qiluvchi va terrorizm vositalaridan foydalanadigan davlat” deb tan oluvchi rezolyutsiyaga ovoz berdi. Bu haqda Reuters xabar berdi.
Rezolyutsiya 494 ta ovoz bilan qabul qilingan, 58 nafar deputat ushbu hujjatga qarshi ovoz bergan, 44 nafari esa betaraf qolgan. Hujjatda nafaqat Ukrainadagi urush bilan bog‘liq ayblovlar, balki Rossiyaga qarshi boshqa ayblovlarni ham bor.
Yevroparlament Yevropa Komissiyasi va Yevropa Ittifoqiga a’zo davlatlarni “Rossiyaga sanksiyalarni chetlab o‘tishga yordam berishga harakat qilayotgan davlatlarga qarshi mumkin bo‘lgan choralarni ko‘rib chiqishni” taklif qiladi.
Yevroparlament deputatlarining tavsiyalari orasida “Rossiya yoqilg‘i va uran importiga zudlik bilan va to‘liq embargo qo‘yish, shuningdek, ‘Shimoliy oqim 1’ va ‘Shimoliy oqim 2’ gaz quvurlaridan butunlay voz kechish” o‘rin olgan.
Tayvan Xitoy qiruvchilari va kemalari orolga yaqinlashayotgani haqida xabar bermoqda
Tayvan mudofaa boshqarmasi orolga tutash hududda Xitoy xalq ozodlik armiyasi (XXOA) Harbiy-dengiz kuchlarining to‘rtta kemasi, ikkita qiruvchi samolyoti va bir harbiy vertolyotini aniqladi, deb yozmoqda “RBK” boshqarma xabariga tayanib.
“Bugun, soat 6:00 holatiga (Toshkent vaqti bilan 3:00) Tayvan atrofida hududda Xitoy xalq ozodlik armiyasi ning uchta uchar apparati va to‘rtta kemasi aniqlandi”, — deyiladi xabarda.
Tayvan Mudofaa vazirligi ma’lumotlariga ko‘ra, manyovrlar davomida Xitoyning ikkita J-16 qiruvchi samolyoti janubi-g‘arbiy hududdagi Tayvan havo hujumidan' mudofaa identifikatsiya zonasiga kirgan, orol sharqida esa suvosti kemasiga qarshi Ka-28 vertolyot qayd etilgan.Tayvan armiyasi bunga javoban samolyotlarni havoga ko‘tardi, radioogohlantirishlar berdi va zenit-raketa tizimlarini shayladi.
Umuman olganda, Tayvan Xitoydan ajralib chiqqani haqida 1949-yilda, fuqarolar urushi davrida e’lon qilgan. Pekin orolning mustaqilligini tan olmaydi va uni o‘z provinsiyasi deb hisoblaydi.
O‘zbekiston yerlarining sho‘rlanib borishi qishloq xo‘jaligini cheklashga olib kelmoqdami?
Ekspertlarning baholashiga ko‘ra, bugungi kunda O‘zbekistondagi 70 foizdan ortiq yer maydonlari degradatsiyaga uchragan bo‘lib, har yili 830 mln dollarlik yo‘qotishlar kuzatilmoqda. Bu haqda Senat matbuot xizmati xabar berdi.
Xususan, eng ko‘p sho‘rlangan yerlar Qoraqalpog‘istonda (90-95 foizni), Buxoroda (96 foizni) va Xorazm vohasida (95-100 foizni) joylashgan. Davlat ekologiya qo‘mitasining ma’lumotiga ko‘ra, organik moddalarning 30-40 foizga kamayishi hisobiga respublika hududining 40 foiz tuproqlari unumdorligi pasaygan.
Shu bilan birga, 800 ming gektarga yaqin sug‘oriladigan yerlar sug‘orish texnikasi hamda yerlarni tekislash tadbirlari noto‘g‘ri amalga oshirilayotgani tufayli eroziyaga uchramoqda.BMTning barqaror ekotizimlar va cho‘llanish bo‘yicha Global markazi ekspertlari yaqin yillarda yerlarning degradatsiyasi qishloq xo‘jaligi rivojlanishini cheklashga olib kelishi mumkinligini ta’kidlagan.
“O‘zbekistonda yerlarni degradatsiya va cho‘llanishga qarshi kurashish bo‘yicha bir qator tadbirlar olib borilishi, Keyingi yillarda yerdan foydalanish, qishloq xo‘jaligi, suv xo‘jaligi, o‘rmon xo‘jaligi sohalari va atrof muhitni muhofaza qilish masalalari bo‘yicha ko‘plab me’yoriy huquqiy hujjatlar qabul qilingan bo‘lsa-da, bunday holatlarning oldini olishda zamonaviy innovatsion texnologiyalarni joriy etish muhim masala”, — deyiladi Senat xabarida.
Izoh (0)