Европарламент фон дер Ляйен бошчилигидаги Европа комиссиясининг янги таркибини тасдиқлади.
Страсбургда бўлиб ўтган ялпи мажлисда Европарламент аъзолари ушбу лавозимга қайта сайланган Урсула фон дер Ляйен бошчилигидаги Европа комиссиясининг янги таркибини, шунингдек, Европа иттифоқининг Олий вакили этиб эстониялик Кая Калласни кўпчилик овоз билан қўллаб-қувватладилар.
Овоз берган 688 депутатдан 370 нафари янги комиссияни қўллаб-қувватлади, 282 нафари қарши, 36 нафари бетараф қолди.
Эндиликда фон дер Ляйен комиссияси Европа иттифоқи кенгашидан расмий рухсат олиши керак, шундан сўнг у 1 декабрдан иш бошлаши мумкин.
Сентябрь ойида фон дер Ляйен янги беш йиллик муддат учун ЕИ таркиби бўйича ўз таклифини тақдим этган эди. Еврокомиссия раҳбарининг талабига кўра, унинг янги таркиби 40 фоиз аёллардан иборат бўлади ва улар олтита вице-президентлик лавозимидан тўрттасини олади.
Европа дипломатияси раҳбари лавозимини Эстония вакили Кая Каллас эгаллайди. Аввалроқ у Европарламент аъзолари олдидаги чиқишида Украинани қўллаб-қувватлаш, Россия ва Хитойга қарши туришни ўзининг устувор йўналишлари деб атаган эди.
Янги Европа комиссиясига номзодлар қаторида Европа иттифоқининг фаровонлик ва саноат стратегияси бўйича бўлажак вице-президенти Стефан Сежурне, технологик суверенитет, хавфсизлик ва демократия бўйича вице-президентлар Хенна Виркуннен ҳамда Яшил, адолатли ва рақобатбардош ўтиш бўйича Рибер Тереса, Еврокомиссиянинг ишчи кучи, кўникма ва тайёргарлик масалалари бўйича вице-президенти Роксана Минзату, бирдамлик ва ислоҳотлар бўйича вице-президент Рафаэл Фиттолар бор.
Марош Шефчович савдо ва иқтисодий хавфсизлик бўйича, Валдис Домбровскис иқтисодиёт ва самарадорлик бўйича, Оливер Варҳелли соғлиқни сақлаш бўйича еврокомиссар лавозимларини эгаллайди.
Бельгиянинг собиқ ташқи ишлар вазири Ажа Лабиб инқирозларни бошқариш бўйича Европа комиссари лавозимига, Россияга қарши кайфияти билан танилган Европарламент депутати Андриус Кубилиус эса Мудофаа ва коинот бўйича Европа комиссарлигига тайинланади.
Изоҳ (0)