AQSH prezidenti Donald Trump Isroil xalqaro jurnalistlarga qamal ostidagi G‘azoga kirib, ishlashga ruxsat berishi lozimligini aytdi. Bu haqda Anadolu xabar berdi.
Isroil 2023-yil oktyabridan beri xorijlik jurnalistlarga G‘azoga kirishni taqiqlab qo‘ygan. Faqatgina ayrim hollarda yahudiy armiyasi bilan cheklangan media safarlar tashkil etilmoqda. Hozirgacha G‘azodagi asosiy ma’lumotlar mahalliy falastinlik jurnalistlar orqali kelmoqda. Jurnalistlarni himoya qilish qo‘mitasiga ko‘ra, urush boshlanganidan beri anklavda kamida 184 nafar jurnalist Isroil hujumlari oqibatida halok bo‘lgan. Trump 14-avgust kuni Oq uyda jurnalistlarga shunday deb intervyu berdi:
“Men bunga ruxsat berilishini istayman. Jurnalistlar uchun bu juda xavfli joy, lekin men sektordagi voqealarga guvoh bo‘lishni xohlayman”.
O‘tgan hafta Al Jazeera muxbirlari: Anas al-Sharif, Muhammad Qrayqea va yana 3 kishi G‘azo shahridagi Al-Shifa shifoxonasi yaqinida jurnalistlar chodiriga uyushtirilgan Isroil hujumi oqibatida halok bo‘lgani xabar berilgan edi. Shu bilan sektorda hayotdan ko‘z yumgan jurnalistlar soni, ba’zi manbaalarga ko‘ra 234 nafarga yetgan.
2023-yil oktyabridan beri Isroil G‘azoda keng ko‘lamli harbiy amaliyot o‘tkazib, 61 mingdan ortiq falastinlikni (shundan deyarli yarmi ayollar va bolalar) o‘ldirgan. Hudud kuchli ocharchilik ichida qolgmoqda. Xalqaro e’tirozlarga qaramay, Isroil xavfsizlik kengashi o‘tgan hafta yahudiy Bosh vaziri Binyamin Netanyaxuning rejasini ma’qullab, G‘azo shahrida harbiy amaliyotlarni kengaytirish va hududni egallashga qaror qilgan. Hozirda anklavdagi aholi “majburan” ko‘chirilish arafasidaligi aytilmoqda.
Izoh (0)