Қозоғистон президенти Қосим-Жўмарт Тўқаев Украина атрофидаги вазиятнинг кескинлашуви муносабати билан асосий ҳарбий ва фуқаролик объектлари хавфсизлигини таъминлаш мақсадида бош вазир, президент администрацияси раҳбари, барча куч ишлатиш идоралари раҳбарлари ва ҳокимларга шошилинч чоралар кўришни топширди. Бу ҳақда 21 ноябрь куни кечқурун Тўқаевнинг маслаҳатчиси — матбуот котиби Берик Уали маълум қилди.
“Қозоғистон Парламенти палаталарининг раислари қабул қилинаётган чоралар тўғрисида хабардор этилди. Мамлакатдаги вазият президентнинг шахсий назорати остида”, деди Берик Уали.
У давлат учун асосий стратегик мақсад — барқарорлик, осойишталик, қонунийлик ва тартибни сақлаш эканини билдирди.
“Қозоғистон икки славян халқи ўртасидаги ҳарбий ҳаракатларни музокаралар йўли билан тўхтатиш масаласини бир неча бор қўллаб-қувватлаган”, деди Тўқаевнинг маслаҳатчиси.
Украинадаги сўнгги вазият
19 ноябрь куни Украина армияси Россия ҳудудига АҚШнинг узоқ масофага учувчи ATACMS ракеталари билан зарба берди. Ҳужум Брянск вилояти Карачев шаҳридаги ҳарбий объектга қаратилган. ATACMS’нинг максимал учиш масофаси 300 километрни ташкил қилади.
АҚШ президенти Жо Байден 17 ноябрь куни мазкур ракетани Россия ичкарисига қўллашга рухсат берди. Украина узоқ вақтдан бери Ғарб қуроллари билан Россия ҳудудига зарба беришга рухсат этилишини кутаётганди. Кремль раҳбари Владимир Путин эса бундай қуролларни Россияга қарши қўллаш урушга киришишни англатишидан огоҳлантирган.
21 ноябрь куни Россия илк бор Украинанинг Днепр шаҳри бўйлаб қитъалараро баллистик ракета учирди. Ҳужум Астрахан вилоятидаги полигондан амалга оширилган. Қитъалараро баллистик ракета беш минг километр масофани босиб ўтиши мумкин, аммо уларнинг баъзилари тўққиз минг километрдан ортиқ масофага мўлжалланган.
Дастлаб ракета ҳужуми ҳақида Украина Қуролли кучлари хабар берган. Кейинчалик маълумотни Россия президенти тасдиқлаган. Путинга кўра, Россия Америка ва Британияда ишлаб чиқарилган қуролларнинг мамлакат ҳудудига ҳужумларига жавобан “Орешник” ракетасидан фойдаланган.
Изоҳ (0)