“Daryo” nashri 21-dekabrda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Rossiya prezidenti Vladimir Putin bu yil parlamentga murojaat yo‘llamaydi
2022-yilda Vladimir Putinning Federal Majlisga murojaati bo‘lmaydi, u keyingi yilga ko‘chirildi, deb xabar berdi “Kommersant”ga Rossiya prezidenti ma’muriyatiga yaqin uch manba.Rossiya prezidenti ma’muriyatidagi vaziyatdan yaxshi xabardor manba jurnalistlar bilan suhbatda, frontdagi vaziyat aniq bo‘lganidan keyingina prezident parlamentda nutq so‘zlagani ma’qulroq ekanini aytdi.
“Vladimir Putinning murojaati har doim kelajakning ma’lum bir tasviri bilan bog‘liq”, — deb tushuntirdi boshqa suhbatdosh. Uning qo‘shimcha qilishicha, murojaatda, jumladan, Ukrainadagi urush haqida gapirish kerak, bu haqda esa prognoz qilish qiyin bo‘lmoqda.
Keyinroq Rossiya prezidentining matbuot kotibi Dmitriy Peskov jurnalistlarga Putin 2022-yilda Federal Majlisga murojaat yo‘llamasligini tasdiqlagan.
Ayni vaziyatda Rossiya Xavfsizlik kengashi raisi o‘rinbosari, sobiq prezident Dmitriy Medvedev Xitoy rahbari Si Szin Pin bilan uchrashdi. Pekindagi Davlat uyida bo‘lib o‘tgan uchrashuvda Medvedev Xitoy rahbariga Rossiya prezidenti Vladimir Putinning murojaatini yetkazdi.
Sobiq prezidentning ma'lum qilishicha murojaatda “Rossiya—Xitoy siyosiy muloqoti va amaliy hamkorligining misli ko‘rilmagan darajasi” qayd etilgan.
Zelenskiyning Vashingtonga tashrifidan qanday maqsadlar ko‘zlanmoqda?
Ukraina prezidenti Vladimir Zelenskiy 21-dekabr kuni AQSH prezidenti Jo Bayden bilan uchrashish uchun Vashingtonga uchib ketgan. Bu haqda CNN manbalariga tayanib xabar bermoqda.
Oq uy Ukraina prezidenti Vladimir Zelenskiy Vashingtonga tashrif buyurishini va Kongress ikkala palatasining qo‘shma sessiyasida nutq so‘zlab chiqishini tasdiqladi. Oq uyning yuqori martabali amaldori 20-dekabr kungi brifingda ma’lum qilishicha: Bugungi uchrashuv chog‘ida ikki davlat rahbarlari frontdagi keyingi harakatlar, ukrainalik askarlarni tayyorlash imkoniyatlari, Rossiyaga qarshi sanksiyalar va eksport nazorati, iqtisodiyot va energetika sohalarida yordam, shuningdek, gumanitar yordam masalalarini muhokama qiladi.
Ayni vaziyatda Oq uy Ukrainaga 2 milliard dollarlik yangi yordam paketini e’lon qildi, unga Patriot havo hujumiga qarshi mudofaa batareyalari kiradi.
Qozog'iston hukumati Uch tomonlama gaz ittifoqining tuzilishi, unga taklif qilinadigan shartlarga bog‘liq bo‘lishini aytdi
Qozog‘iston Rossiyadan Qozog‘iston, RF va O‘zbekiston o‘rtasida gaz ittifoqi bo‘yicha alohida tashkilot tuzish haqida qandaydir rasmiy takliflar olmagan. Hozircha bu gaz savdosi jarayonlarini integratsiyalash bo‘yicha bir g‘oya, xolos. Bu haqda Qozog‘iston tashqi ishlar vaziri o‘rinbosari Almas Aydarov ma’lum qildi.
Uning ta’kidlashicha, hamma narsa Qozog‘istonga taklif qilinadigan shartlarga bog‘liq bo‘ladi. Qozog‘iston tashqi ishlar vaziri o‘rinbosarining so‘zlariga ko‘ra, gaz bo‘yicha alohida tuzilma yoki davlatlararo ittifoq tuzish masalasi hozircha ko‘tarilgani yo‘q.
Noyabr oxirida Rossiya va Qozog‘iston prezidentlari Vladimir Putin va Qosim-Jo‘mart To‘qayev Moskvada uchrashuv o‘tkazib, Rossiya, Qozog‘iston va O‘zbekiston ishtirokida “uch tomonlama gaz ittifoqi” tuzishni muhokama qildi.
O‘zbekiston-Afg’oniston yo‘lidagi transport logistika xabi xalqaro maqom oladimi?
BMT Xavfsizlik Kengashining Afg‘onistondagi vaziyatni muhokama qilishga bag‘ishlangan yig‘ilishida O‘zbekistonning BMTdagi doimiy vakili o‘rinbosari, Muvaqqat ishlar bo‘yicha vakil Nurilla Abdullayev O‘zbekiston tomonidan Afg‘onistonda uzoq muddatli tinchlik o‘rnatish borasida amalga oshirilayotgan chora-tadbirlar haqida ma’lumot berdi, deb xabar qilmoqda “Dunyo” AA.
O‘zbekiston Tolibon harakati bilan muloqot orqali so‘nggi 25 yil ichida birinchi marta shimoliy viloyatlarda qizlar uchun maktablar ochishga, Pokiston dengiz bandargohlariga va Afg‘oniston orqali yuk tranzitini yo‘lga qo‘yishga muvaffaq bo‘ldi. Shu bilan birga, o‘tgan 10 oy davomida mazkur tranzit yo‘nalishi bo‘yicha har ikki yo‘nalishda 600 ming tonnaga yaqin yuk tashilgan bo‘lib, hech qanday xavfsizlik hodisasi kuzatilmagan.
Termiz shahridagi ko‘p funksiyali transport-logistika xabi orqali ushbu yo‘nalishdagi xalqaro sa’y-harakatlar muvofiqlashtirilayotgani qayd etilib ushbu xabga BMT shafe’ligida xalqaro maqom berish taklifi bildirildi.
Shuningdek yig‘ilishda, Jahon hamjamiyati afg‘onlar taqdiri, bu mamlakat kelajagi uchun ma’naviy javobgarlikni o‘z zimmasiga olishi va bu mamlakatning qayta izolyatsiya qilinishiga yo‘l qo‘ymaslik kerakligi eslatildi. Ayni vaziyatda “Tolibon” harakati Afg‘onistondagi universitetlarni ayollar uchun yopgani ham ko‘plab muhokamalarga sabab bo’lmoqda
Izoh (0)