Xitoydagi kompaniyalardan biri vazn yo‘qotgan xodimlarga har bir tashlangan 500 gramm uchun 500 yuan (taxminan 70 dollar) to‘laydi. Bu haqda Shanghai City News Service xabar berdi.
Tashabbus Insta360 kameralar ishlab chiqaruvchi kompaniyaga tegishli. Ular xodimlar uchun “Oz va pul top” nomli chellenjni yo‘lga qo‘ygan. Biroq qoidaga ko‘ra, vazn orttirgan xodimlar kompaniyaga pul to‘laydi. Har bir ortgan 500 gramm uchun 800 yuan (112 dollar) undiriladi.
Aksiyada 99 nafar xodim ishtirok etib, jami 950 kilogramm vazn yo‘qotgan. Ular umumiy 1 million yuan (139 ming dollar) mukofot olgan. Hech kim jarimaga tortilmagan.
Insta360 vakillarining ta’kidlashicha, loyiha sog‘lom turmush tarzini ommalashtirish, xodimlarda hayot hamda ishga ijobiy munosabatni shakllantirishga qaratilgan. Tashabbus ijtimoiy tarmoqlarda katta qiziqish uyg‘otgan. Ko‘plab foydalanuvchilar o‘z kompaniyalarini ham shunday amaliyotni joriy etishga chaqirgan.
Bungacha Guandun provinsiyasidagi oziq-ovqat qo‘shimchalari ishlab chiqaruvchi Wonderlab kompaniyasi ham bir oylik vazn yo‘qotish tanlovini o‘tkazgan edi. Unda 224 xodim jami 750 kilogramm vazn yo‘qotib, 171 ming yuanni (23,8 ming dollar) bo‘lib olgan. Rekord o‘rnatgan ishtirokchi esa 16,4 kilogramm vazn tashlab, 7600 yuan (1059 dollar) ishlab topgan.
Bu kabi dasturlar Xitoy Sog‘liqni saqlash milliy komissiyasining vaznni ilmiy nazorat qilish va semirishga qarshi kurash bo‘yicha 3 yillik rejasiga mos keladi. Milliy tadqiqotlarga ko‘ra, 2023-yilda Xitoyda katta yoshlilarning 57 foizida ortiqcha vazn yoki semizlik kuzatilgan. Bu ko‘rsatkich 2018-yilda 51 foiz, 2013-yilda esa 46 foiz bo‘lgan edi.
Agar samarali choralar ko‘rilmasa, 2030-yilga kelib ortiqcha vazn va semizlik darajasi kattalar orasida 65 foizga yetishi, semizlik bilan bog‘liq sog‘liqni saqlash xarajatlari esa 418 milliard yuanga teng bo‘lishi mumkin. Bu Xitoyning umumiy sog‘liqni saqlash xarajatlarining 22 foizini tashkil etadi.
Izoh (0)