Qozog‘iston prezidenti Qosim-Jo‘mart To‘qayev Rossiya-Ukraina konflikti bo‘yicha bayonot berdi. Bu haqda Tengrinews xabar berdi.

“Qozog‘iston va Rossiya dunyodagi eng uzun quruqlik chegarasiga ega. Bizda hamkorlik anʼanalari bor, xoh u savdo, xoh gumanitar aloqalar bo‘lsin, 2013-yilda mamlakatlarimiz o‘rtasida ittifoqchilik munosabatlari to‘g‘risida shartnoma imzolangan”, — dedi To‘qayev.

Ukraina konfliktiga kelsak, Qozog‘iston harbiy harakatlarni zudlik bilan to‘xtatish va BMT nizomi asosida tinchlik muzokaralarini o‘tkazish tarafdori. 

“Bugun men Germaniya kansleriga aslida vaziyat juda jiddiy ekanini aytdim. Ukraina va Rossiya tomonlari muzokaralarga tayyor ekanini da’vo qilmoqda, biroq muzokaralar platformasi hali aniq emas”, — dedi To‘qayev.

Shuningdek, Qozog‘iston prezidenti qanday asosda muzokaralar olib borish mumkinligi aniq emasligini bildirdi.

“Shuning uchun oqilona, ​​ratsional, dono diplomatiya davri keladi. Tinchlik muzokaralarida har ikki tomon maqbul asos topishi uchun o‘zaro ayblovlarni to‘xtatib, muzokaralar olib borish kerak”.