Amerika Qo‘shma Shtatlari Ukrainaga Xalqaro taraqqiyot agentligi orqali 1,35 milliard dollar miqdorida grant ajratdi. Bu haqda ijtimoiy tarmoqlarda Ukraina bosh vaziri Denis Shmigal ma’lum qildi.
“Ukraina Amerika Qo‘shma Shtatlaridan 1,35 milliard dollarlik grant oldi. Biz bu mablag‘larni ustuvor gumanitar va ijtimoiy dasturlarga yo‘naltirmoqdamiz. Hukumatimiz shu va kelgusi yilda ham zarur moliyaviy resurslarni ittifoqchilarimizdan safarbar qilishda davom etadi”, deya ta’kidladi u.
Jahon bankidan 750 million dollar
Avvalroq Denis Shmigal Jahon banki Ukrainaga 750 million dollar miqdorida yangi yordam paketi ajratishini ma’lum qilgandi.
“Mablag‘lar Yevropa ittifoqiga qo‘shilish uchun zarur bo‘lgan institutsional islohotlarni qo‘llab-quvvatlashga qaratilgan ‘Sog‘lom fiskal boshqaruv orqali tiklanishni qo‘llab-quvvatlash’ loyihasi doirasida taqdim etiladi. Ushbu mablag‘ning bir qismi Yaponiya hukumati tomonidan qo‘llab-quvvatlanadigan Advance Ukraine jamg‘armasidan ajratiladi”, deb yozdi Shmigal.
Buyuk Britaniyaning Ukrainaga yordami
Shuningdek, Ukraina bosh vaziri Denis Shmigal Buyuk Britaniya har yili harbiy ehtiyojlar uchun Ukrainaga 3 milliard funt sterling yuborishini ham ma’lum etgandi.
Uning so‘zlariga ko‘ra, mamlakatni qo‘llab-quvvatlash bo‘yicha ajratiladigan yangi paketga 162 million funt sterlingli havo hujumidan mudofaa raketalari kiradi.
Qolaversa, energetika sohasini qo‘llab-quvvatlash uchun ham 30 million funt sterling beriladi.
Oktyabr oyi boshida Yevropa ittifoqi diplomatiyasi rahbari Jozep Borrel G‘arbning harbiy va iqtisodiy yordami bo‘lmasa, Ukrainadagi urush ikki hafta ichida tugashini aytib o‘tgandi.
“Ko‘pchilik bu mojaroning tezroq tugashini xohlaydi. Agar biz Ukrainani qo‘llab-quvvatlashni to‘xtatsak, 15 kundan so‘ng urush tugaydi va Putin o‘z maqsadlariga erishadi. Biroq biz ukrainlar uchun shunday bo‘lishini xohlamaymiz”, degandi Borrel.
Izoh (0)