Rossiya 21-noyabr kuni o‘zining o‘rta masofali “Oreshnik” raketasini Ukrainadagi obyektga qarata uchirdi. Bu haqda Rossiya prezidenti Vladimir Putin ma’lum qildi.
Putin Rossiya o‘zini mamlakat hududiga qarata qurol ishlatayotgan davlatlarning harbiy obyektlariga qarshi qurol ishlatishga haqli deb hisoblashini aytdi.
“Rossiya qurolli kuchlari 21-noyabr kuni Ukraina harbiy-sanoat majmuasi obyektlaridan biriga hujum uyushtirdi. Rossiyaning eng yangi o‘rta masofali raketa tizimlaridan biri ham jangovar sharoitlarda sinovdan o‘tkazildi. Ushbu holatda, yadroviy bo‘lmagan gipertovushli jihozlangan ballistik raketadan foydalanildi”, deydi Putin.
Uning so‘zlariga ko‘ra, sinovlar muvaffaqiyatli o‘tgan, armiya ko‘zlangan maqsadga erishgan: “Dnepropetrovskda Sovet ittifoqi davridan beri eng yirik va mashhur sanoat majmualaridan biri bo‘lgan, bugungi kunda raketa texnologiyalari va boshqa qurollar ishlab chiqaradigan Yujmash zavodi zarar ko‘rgan”.
Putinga ko‘ra, Rossiya Amerika va Britaniyada ishlab chiqarilgan qurollarning mamlakat hududiga hujumlariga javoban “Oreshnik”dan foydalangan.
Ukraina QK tomonidan Bryansk va Kursk viloyatlaridagi harbiy nishonlarga 19-noyabr kuni oltita ATACMS raketalari va 21-noyabrda Storm Shadow hamda HIMARS raketalari bilan zarba berilgani e’lon qilingan edi.
“Shu paytdan boshlab, biz bir necha bor ta’kidlaganimizdek, avvalroq G‘arb tomonidan qo‘zg‘atilgan Ukrainadagi mintaqaviy mojaro global miqyosda tus oldi”, dedi Rossiya yetakchisi.
Putin o‘z bayonotida Rossiya raketalardan foydalanishdan oldin Ukraina fuqarolarini xavfli zonani tark etish haqida ogohlantirishini ta’kidladi.
“Rossiya tinch yo‘lni afzal ko‘radi, biroq voqealarning har qanday rivojiga ham tayyor, javob doimo tayyor”, deya qo‘shimcha qilgan u.
Izoh (0)