Londonning “Tottenhem” klubi “Manchester Siti” safida to‘p surayotgan 21 yoshli braziliyalik futbolchi Savinyo uchun 70 million yevro taklif qildi. Bu haqda Globo nashri xabar bermoqda.
Manbaga ko‘ra, “shaharliklar” mazkur taklifni rad etgan, biroq tomonlar futbolchining transferi bo‘yicha muzokaralarni davom ettirmoqda.
Ayni damda “Tottenhem”da qanot hujumchilariga ehtiyoj bor. Klub yozgi transfer oynasi chog‘ida koreyalik hujumchi Son Hyon Minni AQSHning “Los-Anjeles” klubiga sotdi. Bundan tashqari, Jeyms Meddison ham uzoq muddatga safdan chiqqan. Shu sababdan bosh murabbiy Tomas Frank transfer oynasi yopilguniga qadar yangi vinger xarid qilish zarurligini ta’kidlamoqda. Hozirda asosiy nomzod sifatida Savinyo ko‘rilmoqda.
Ma’lumotlarga ko‘ra, futbolchi “Manchester Siti”ni tark etishga qarshi emas. Chunki klubdagi kuchli raqobat fonida u zaxira futbolchisiga aylanishi mumkin. Vingerning o‘zi esa doimiy o‘yin amaliyotiga ega bo‘lish xohlaydi.
Ma’lumot uchun, Savinyo 2024-yil yozida “Manchester Siti”ga qo‘shilgan. U o‘tgan mavsum barcha musobaqalar doirasida jami 48 o‘yinda maydonga tushib, 3 ta gol va 13 ta golli uzatmaga mualliflik qilgan.
- Futbolchining klub bilan shartnomasi 2029-yil yozigacha amal qiladi.
- Transfermarkt portali Savinyoning qiymatini 50 million yevroga baholagan.
Izoh (0)