Ukraina prezidenti Vladimir Zelenskiy Markaziy Osiyo jurnalistlariga intervyu berdi. Qozog‘iston va Qirg‘iziston mamlakatlari qatorida o‘zbekistonlik jurnalist Alisher Azimov ham mazkur intervyuda qatnashdi.
Vladimir Zelenskiy nima uchun Markaziy Osiyodan jurnalistlarni taklif qilgani haqidagi savolga javob berar ekan, “Ukrainadagi urush oqibatlari va dahshatlarini ko‘rsatish uchun” deya javob berdi. Shuningdek, Ukraina prezidenti Boltiqbo‘yi davlatlari, Qozog‘iston va Moldova uchun ham shunday xavf bor, deb hisoblashini ma’lum qildi.
— Hech kim o‘z qarashlarini targ‘ib qilmasligi uchun o‘zingiz ma’lumot olishingiz, hamma narsani o‘z ko‘zingiz bilan ko‘rishingiz muhim. Hammasiga o‘zingiz guvoh bo‘lishingiz uchun sizga hech narsa demayman. Va men uchun mamlakatingiz urushning haqiqiy oqibatlarini, haqiqiy rus “izi”ni, rus dunyosini va u mamlakatingiz hududiga haqiqatan ham nimani olib kelishga harakat qilayotganini ko‘rishi juda muhimdir. Bunga hech qanday shubham yo‘q, bunga mutlaqo aminman.
Men hech kimni qo‘rqitmoqchi emasman, lekin kim xabardor va ogohlantirilgan bo‘lsa, kuchliroq bo‘ladi. Shuning uchun ham, ularning har bir qilgan ishlari va aytganlari, masalan, “biz Qozog‘iston, O‘zbekiston, Qirg‘iziston bilan do‘stmiz, ular bizning birodarlarimiz”, degan gaplariga ishonmayman... Hammasi yolg‘on. Ishoning, bu bir soniyada sodir bo‘ladi... Avvaliga nimadir ishg‘ol qilinadi, ayniqsa, u yerda ruslar bo‘lsa...
Tirmashib oladigan narsa bo‘lsa bo‘ldi! Mamlakatingiz hududida mavjud bo‘lgan ayrim ozchiliklar yoki jamoalar ta’qib qilinishi kerak, deb aytmayapman. Shunchaki ularga bahona kerakligini aytmoqchiman.
Keyin ba’zi hududni bosib olishni boshlashadi. Shunchaki yordam beramiz deyishadi... Lekin oxiri aniq. Agar siz, sizning xalqingiz, Rossiya tarkibiga kirishga qarshilik qilsangiz, muqarrar ravishda keng ko‘lamli bosqin, o‘lim va urushga duch kelasiz.
Shuning uchun, menimcha, hammasini o‘z ko‘zingiz bilan ko‘rishingiz muhim: urush nima? O‘zi bilan nimalarni olib keladi? Umuman olganda, ular nimani xohlaydi?
Qachonlardir bir intervyuda aytgandim — hamma davlatlar haqida emas — Qozog‘iston haqida gapirganman, razvedka xizmatlaridan turli ma’lumotlarni olayotganimda, Boltiqbo‘yi mamlakatlari birinchi navbatda hujum ostida ekanini anglaganman: Estoniya, Litva, Latviya... Biz bu haqda barcha hamkorlarimizga aytdik. Chunki ular Rossiya tomonidan ushbu davlatlar chegaralarini bosib olish yoki noqonuniy kesib o‘tish orqali NATOning munosabatini sinab ko‘rishlari mumkin.
Biz Boltiqbo‘yi mamlakatlari, Moldova, Qozog‘iston ularning ustuvor yo‘nalishlari ekanligi haqida ma’lumot oldik. Bu Rossiya Federatsiyasining eng yaqin maqsadlari, — dedi Zelenskiy.
O‘zbekistonlik jurnalist Alisher Azimov esa quyidagicha savol berdi:
— Sizga falsafiyroq savolim bor. Qarang, qahramon Vasiliy Petrovich Goloborodko, fuqaro Vladimir Zelenskiy va Ukraina prezidenti Zelenskiy — ularni hozir nima birlashtirmoqda? Ularning fe’l-atvori, tamoyillari va boshqalarda qanday farq bor? Katta siyosat sizning shaxsiyatingizni qanchalik o‘zgartirdi?
Vladimir Zelenskiy uni siyosat emas, urush o‘zgartirganini ta’kidladi.
— Meni katta yoki kichik siyosat emas, urush o‘zgartirdi. Buni nima ekanligini xudo biladi. Urush mavjud bo‘lgan asosiy qadriyatlarni tubdan o‘zgartirdi. Mamlakat, oila, uy, bolalar — bu birinchi o‘rinda. Aytganimdek, biz baʼzan davlatlar o‘rtasidagi tovar ayirboshlash, uni qanday oshirish, 10 ta shartnoma imzolash, turli aloqa yo‘nalishlarini qurish haqida o‘ylaymiz.
Aslida, qadriyatlar boshqacha. Hayot eng katta qadriyatdir. Sizni o‘rab turganlar va sevadiganlar bor. Men faqat oilamni va xalqimni sevaman — bu eng muhimi. Shuning uchun ustuvorliklar o‘zgardi. Menimcha, qadriyatlar o‘zgarmadi. Siz tilga olgan har bir insonni, tirik yoki xayoliy qahramonlarni ana shu qadriyatlar birlashtiradi. Ishonchim komilki, har birimiz uchun eng muhimi qadriyatlarimizni yo‘qotmaslik va inson bo‘lib qolishdir. Men inson bo‘lib qolish uchun qo‘limdan kelganini qilishga ishonaman.
Garchi bu unchalik oson bo‘lmasa-da. Ortiqchalik yo‘qolganligi haqiqatdir. Afsuski, mening yo‘lim qiyin. Ko‘plab yaqin va aziz odamlarim ham turli sabablarga ko‘ra uzoqlashdi. Muayyan his-tuyg‘ularga vaqtim yo‘q, shunchaki vaqtim yo‘q. Kimdir yaxshi, kimdir yomonligi uchun emas. Hamma ham bunga chiday olmaydi.
Odamlar esa meni saylagan, hammasiga chidashim kerak. Menda boshqa yo‘l yo‘q. Shuning uchun buni qilishga majburman va buni mamnuniyat va sharaf bilan bajaraman, — deb javob berdi Zelenskiy.
Shuningdek, Alisher Azimov mamlakatdagi korrupsiya haqida ham savol berdi.
— Tashqi dushman bilan birga, ichki dushman ham bor— bu korrupsiya. Mamlakatdagi hamma narsani o‘ldiradi. Korrupsiyaga qarshi qanday tizimli kurash olib borasiz?
Vladimir Zelenskiy esa bu savolga “Sizlarda-chi?” deya qarshi savol bergan. Alisher Azimov “Turlicha” deya qisqa javob berdi.
— Sizda vaziyat qandayligini bilmayman. Uzr so‘rayman, ehtimol bu kabi savolga tayyor emasdirman. Rostini aytsam, hamma narsaga vaqtim yo‘q. Qarang, Yevropa Ittifoqi qonunchiligi bor va biz hali ham Yevropa Ittifoqiga aʼzo bo‘lishni xohlaymiz. Biz uchun (umumiy) qadriyatlarimiz bor va geografik jihatdan Yevropaning bir qismimiz. Qonunning umumiy qoidalari bor, ular hamma uchun amal qiladi. Korrupsiyaga qarshi tizim — bu qoidalardan biri, davlatimizdagi korrupsiyaga qarshi tuzilma Yevropa davlatlarnikiga qaraganda ancha qat’iyroq.
Lekin bizda korrupsiya yo‘q, demoqchi emasman. Afsuski, korrupsiya hamma joyda mavjud. Kurashishimiz kerakmi? Kerak! Ammo korrupsiyaga qarshi kurash tizimi mustaqil bo‘lishi lozim. Bu qonunlarning barchasini biz qabul qilganimiz aniq. Struktura ishlaydi. Lekin, urush paytida... Urushning zamirida tartibsizlik bor. Hayotni, huquqlarni, erkinliklarni cheklash. Lekin kimdir jang qiladi, kimdir undan foydalanadi. Ammo agar sizda infratuzilma mavjud bo‘lsa, bu muhim emas, hatto kimdir buni buzsa ham, u holda bu odam jazolanadi. Eng muhimi siz korrupsionerlarni, oligarxlarni va hokazolarni qo‘llab-quvvatlamasangiz yoki yashirmasangiz bo‘ldi.
Asosiysi, tegishli idoralar o‘z ishini qilishiga ochiq bo‘lishingiz kerak. Menimcha, siyosiy iroda muhim, buni xohlaysizmi yoki xohlamaysizmi. Qo‘llab-quvvatlaysizmi yoki yo‘q. Menimcha, bu asosiy narsa. Menda siyosiy iroda bor, huquq-tartibot idoralari 30 yildan beri mamlakatni talon-taroj qilgan odamlarni qancha ko‘p aniqlasa, qo‘lga olsa, ularni yuzaga chiqarsa, Ukraina shunchalik boy bo‘ladi, — dedi Zelenskiy.
Izoh (0)