2022-yildan beri Ukraina atrof-muhitiga yetkazilgan zararning umumiy miqdori 65 milliard yevrodan oshadi. Birgina o‘rmon xo‘jaligidagi talafot deyarli 26 milliard dollarga yetdi. Bu haqda Ukraina atrof-muhitni muhofaza qilish va tabiiy resurslar vazirining birinchi o‘rinbosari Olena Kramarenkoga tayanib, “Ukrinform” xabar berdi.
Uning so‘zlariga ko‘ra, vazirlik xodimlari atrof-muhitga zarar yetkazilishi bilan bog‘liq 6500 dan ortiq holatni qayd etgan. Biroq bu “aysbergning uchi” bo‘lishi mumkin. Boisi Rossiya nazorat qilayotgan hududlar va minalangan maydonlarda o‘rganish ishlarini olib borish imkonsiz.
Hozir Ukraina tabiatni muhofaza qilish hududlarining 20 foizini ruslar nazorat qilmoqda yoki urush zonasi hisoblanadi. Harbiy harakatlar sabab 1300 dan ortiq hayvonot va o‘simlik turlari yo‘qolib ketish xavfi bilan yuzlashyapti, deya ogohlantirdi Kramarenko.
Vazir o‘rinbosari ta’kidlashicha, urush oqibatida Ukraina o‘rmonlarining deyarli uchdan bir qismini yo‘qotgan; 10,4 million gektar o‘rmon maydonining qariyb 3 million gektari zarar ko‘rgan.
Bundan tashqari, Kramarenko harbiy harakatlar sabab atigi bir yilda atmosferaga 150 million tonna karbon dioksid issiqxona gazlari chiqarilishini aytdi.
Tadqiqot atrof-muhitga yetkazilgan zarar, jumladan, urush oqibatida zarar ko‘rgan milliy qo‘riqxonalardagi vaziyat, Kaxovka GES to‘g‘onining portlashi oqibatlari, Ukrainadagi konlarning ifloslanish ko‘lami bo‘yicha ma’lumotlarni o‘z ichiga oladi.
Izoh (0)