“Hech narsadan afsusda emasman” — Putin Ukrainadagi urush va ommaviy o‘qqa tutishlar haqida gapirdi (video)

Rossiya prezidenti Vladimir Putin Ukrainaga qarshi yirik raketa zarbalari endi zarur emasligini ta’kidladi. Bu haqda u 14-oktabr kuni Qozog‘iston poytaxti Ostona shahrida MDH sammiti doirasida o‘tkazilgan matbuot anjumanida aytib o‘tdi, deya xabar beradi Focus.

“Hozircha ommaviy zarbalar kerak emas. Ayni paytda boshqa vazifalar bor”, — deya izoh berdi u Kreml Ukrainani ommaviy o‘qqa tutishni davom ettirishni rejalashtiryaptimi, degan savolga.

Undan tashqari, jurnalistning “Ukraina davlat sifatida mavjud bo‘ladimi?” degan savoliga Putin “Rossiya o‘z oldiga Ukrainani yo‘q qilish vazifasini qo‘ymagan”, deb javob berdi.

Shuningdek, u Ukraina bilan urush masalalarida “hech narsadan afsuslanmasligini” ta’kidladi.

“Buni aniq ayta olaman. Hozirda sodir bo‘layotgan voqealar, yumshoq qilib aytganda, yoqimsiz. Lekin Ukrainadagi holat bizda ham biroz kechroq sodir bo‘lardi, faqat bundan ham yomonroq sharoitda”, — deya izoh berdi u.

Shu bilan birga, Rossiya Federatsiyasi prezidenti o‘z harakatlarini to‘g‘ri deb bilishini ta’kidladi.