To‘qayev yana Rossiya harbiy jihatdan yengilmasligini ta’kidladi

Qozog‘iston prezidenti Astana Think Tank Forum yalpi majlisida so‘zga chiqib, yana Rossiya va Ukraina o‘rtasidagi urush haqida fikr bildirdi. Bu haqda “KazTag” xabar berdi.

“Kansler Shols bilan muzokaralar davomida aytganimdek, Rossiya harbiy jihatdan yengilmasdir. Bu Rossiyaning harbiy salohiyati, mamlakat aholisining prezident Putin siyosatini qo‘llab-quvvatlashi va tarixning o‘zi bilan tasdiqlanadigan faktdir.

Shu sababli, biz tinch yo‘l bilan hal etish variantlarini izlashni zarur deb hisoblaymiz va barcha davlatlarning, jumladan, Xitoy va Braziliyaning ham real rejalarini qo‘llab-quvvatlaymiz. Boshqa yo‘l yo‘q. Muqobil variant — bu o‘zaro qirg‘in urushidir. Ehtimol, ba’zi jahon kuchlari bundan manfaatdordir, ammo bu tubsizlikka olib boradigan yo‘ldir. Konstruktiv muzokaralar orqali tinchlikka intilish zaiflik belgisi emas, balki strategik donishmandlikning namoyon bo‘lishidir”, dedi u.

To‘qayev sentyabr oyi o‘rtalarida Germaniya kansleri Shols bilan uchrashuvda Rossiyani yengilmas deb atagandi. Shu bilan birga, Qozog‘iston prezidenti Xitoy va Braziliyaning Rossiya—Ukraina urushini hal qilish rejasini eslatib o‘tgan. Biroq Zelenskiy bu rejani destruktiv deb atagan va uni muhokama qilishdan bosh tortgan.