Qo‘shma Shtatlar kelajakda yadro arsenalini oshirishni istisno etmayapti, biroq bu qarorni mamlakatning saylangan prezidenti Donald Tramp qabul qiladi. Bu haqda Amerikaning amaldagi yetakchisi Jo Bayden ma’muriyatidagi manbalarga tayanib, Wall Street Journal (WSJ) xabar berdi.
“Agar hozirgi tendensiya davom etsa va vaziyat salbiy tomonga o‘zgarmasa, kelajakda AQSHning joylashtirilgan yadro qurollari sonini ko‘paytirish zarurati paydo bo‘lishi mumkin”, dedi ismi oshkor etilmagan yuqori martabali amaldori.
Uning so‘zlariga ko‘ra, “salbiy ssenariy” Rossiya “qurol nazoratidan voz kechishi”, Xitoy va Shimoliy Koreya esa “o‘z imkoniyatlarini oshirishi” bilan bog‘liq.
Xabarda, shuningdek, Kongressga yuboriladigan yadro qurolidan foydalanish bo‘yicha maxfiylashtirilgan hisobotda aniq qadamlar ko‘rsatilmagani, ammo Qo‘shma Shtatlar o‘zining yadroviy imkoniyatlarini, “uning tuzilishi va hajmini” hisobga olgan holda moslashtirishi kerakligi aytilgan.
“Bizning ko‘plab dushmanlarimiz yadro qurolini o‘zlarining milliy xavfsizlik strategiyalarining muhim tarkibiy qismiga aylantirmoqdalar”, deya qo‘shimcha qildi WSJ.
Nashr, shuningdek, Tramp inauguratsiyadan so‘ng yadroviy triadaning barcha qismlarini mustahkamlash uchun bir nechta “tayyor variantlarga” ega bo‘lishini qayd etgan.
AQSH Energetika vazirligi avvalroq Qo‘shma Shtatlar va Janubiy Koreya yadroviy eksport hamda hamkorlik tamoyillari bo‘yicha dastlabki kelishuvga erishganini ma’lum qilgan edi. Aniqlik kiritilishicha, tomonlar fuqarolik yadro texnologiyalari eksporti ustidan nazoratni kuchaytirgan.
Izoh (0)