Federal qidiruv byurosi (FQB) agentlari AQSH sobiq prezidenti Donald Trampning qarorgohida o‘tkazilgan tintuv chog‘ida, shu jumladan, yadro quroli bilan bog‘liq hujjatlarni ham qidirgan. Bu haqda The Washington Post o‘z manbalariga tayanib xabar bermoqda.
Nashr suhbatdoshlari aynan qanday ma’lumotlar FQB xodimlarini qiziqtirgani haqidagi tafsilotlarni keltirmagan. Shuningdek, ular hujjatlarda tilga olingan yadro quroli qaysi davlatga tegishli ekanini ham ochiqlamadi. Hamda agentlar ushbu hujjatlarni topgan-topmagani ham noma’lum.
Trampning vakili, AQSH Adliya vazirligi va FQB izohlardan bosh tortdi.
WP suhbatlashgan ekspertlar fikricha, tintuvlar AQSH hukumati mansabdorlari, go‘yoki, Trampda saqlanayotgan va begona qo‘llarga tushib qolishi mumkin bo‘lgan maxfiy axborot yuzasidan xavotir olayotganini bildiradi.
Eslatib o‘tamiz, avvalroq Donald Tramp, Mar-a-Lagodagi qarorgohida o‘tkazilgan tintuvlardan keyin, o‘ziga qarshi guvohlik berishdan bosh tortgan edi.
FQB agentlari 8-avgust, dushanba kuni Trampning Floridadagi Mar-a-Lago qarorgohida tintuv o‘tkazgan edi. The New York Times vaziyatdan xabardor manbalariga tayanib yozishicha, FQB Trampning uyini u Oq uyni tark etganidan keyin o‘zi bilan olib ketgan hujjatlar tufayli tintuv qilmoqda. Hujjatlarda maxfiy ma’lumotlar bo‘lishi mumkin.
Nashrga ko‘ra, AQSH milliy arxivi “ko‘p oylar davomida” 15 quti hujjatlarni qaytarishni so‘ragan va ushbu hujjatlar yo‘q qilinishi ehtimoli yuzasidan FQBga murojaat qilgan. “Janob Tramp o‘z prezidentligi davrida hukumat arxivlarida saqlanishi kerak bo‘lgan rasmiy qog‘ozlarni yo‘q qilib tashlagani bilan tanilgan”, — deb yozadi gazeta.
Keyinroq hujjatlar qaytarilgan.
Trampning so‘zlariga ko‘ra, agentlar tintuv chog‘ida hatto uning seyfini ham buzib ochgan. Sobiq prezident FQB xatti-harakatlarini siyosiy tusga ega deb atadi. Uning ishonch bildirishicha, amaldagi prezident Jo Bayden FQBning tintuv o‘tkazish niyatidan xabardor bo‘lgan. Agar ish rasman ayblov e’lon qilishgacha borib yetsa, Tramp 2024-yilgi prezidentlik sayloviga o‘z nomzodini qo‘yish imkoniyatidan mahrum bo‘lishi mumkin.
Trampga nisbatan yana bir ish 2021-yil 6-yanvarda Kapitoliyda yuz bergan tartibsizliklar bilan bog‘liq.
AQSHda avvalgi prezidentlik saylovlari 2020-yilning noyabr oyida bo‘lib o‘tgan. Saylov natijalariga ko‘ra, Tramp 232 ta, uning raqibi Jo Bayden 306 ta ovoz to‘plagan. Bayden ovoz berish adolatli o‘tganini ta’kidlaydi.
2021-yilning yanvar oyi boshida Vakillar palatasi saylov natijalarini ma’qullaydigan kuni Tramp tarafdorlari Vashingtonda mitingga yig‘ildi. Namoyishchilar Kapitoliyni egallab oldi, ularga qarshi ko‘zni yoshlatuvchi gaz va shovqinli granatalardan foydalanildi. To‘qnashuvlarda besh kishi halok bo‘lgan. Bayden Trampni zo‘ravonlikka undaganlikda aybladi.
Izoh (0)