AQSH davlat kotibi Entoni Blinken Rossiyaning yadroviy doktrinasiga prezident Vladimir Putin tomonidan e’lon qilingan o‘zgarishlarga izoh berdi. Blinken bu qarorni “mas’uliyatsizlik” deb atadi.
“Bu mutlaqo mas’uliyatsizlik. O‘ylaymanki, u ilgari yadro quroli bilan tahdid qilganda, dunyoda ko‘pchilik bu haqda gapirgan, shu jumladan, Xitoy ham. Aytishim kerakki, hozir butun dunyo BMT Bosh assambleyasiga yig‘ilib, ko‘proq qurolsizlanish zarurligini e’lon qilayotgan paytda bu ishni takrorlash kerak”, dedi Entoni Blinken.
Kecha, 25-sentyabr kuni Vladimir Putin raisligida Rossiya Xavfsizlik kengashining yadroviy to‘siq bo‘yicha doimiy yig‘ilishi bo‘lib o‘tdi. Uchrashuvning asosiy mavzusi oxirgi marta 2020-yilda yangilangan Rossiya yadroviy doktrinasiga tuzatishlar kiritish bo‘ldi.
Yangi hujjatga ko‘ra, har qanday yadroga ega bo‘lmagan davlatning Rossiyaga yadroviy qurolga ega davlat ko‘magida tajovuz qilishi hujum deb hisoblanadi. Harbiy samolyotlar, qanotli raketalar va dronlarning ommaviy hujumi haqidagi ma’lumotlar yadro qurolidan foydalanishga asos bo‘lishi mumkin.
Prezident matbuot kotibi Dmitriy Peskovning tushuntirishicha, yadroviy doktrinaga kiritilgan o‘zgarishlar do‘stona bo‘lmagan davlatlarga Rossiyaga hujumning mumkin bo‘lgan oqibatlari haqida signaldir. Shu bilan birga, Peskov Rossiya Federatsiyasi yadro arsenallarini ko‘paytirishni rejalashtirmayotganini ta’kidladi.
Izoh (0)