Shimoliy Koreya Yaponiyani sun’iy yo‘ldosh uchirishi haqida ogohlantirdi. Bu haqda Yaponiya qirg‘oq qo‘riqlash xizmatiga tayanib, Deutsche Welle xabar berdi.
-3GBMHk2h.jpg)
KXDR bildirishnomasida Koreya yarimoroli va Filippinning Luson oroli yaqinidagi dengizda raketa tashuvchisi qoldiqlari tushishi mumkin bo‘lgan uchta xavfli zona aniqlandi, — deyiladi xabarda.
Avvalroq Janubiy Koreya rasmiylari KXDR o‘zining ikkinchi harbiy josuslik sun’iy yo‘ldoshini orbitaga chiqarish niyatida ekani haqida ma’lum qilgan edi. Seulga ko‘ra, Rossiya Shimoliy Koreyaning Ukrainaga qarshi urushda Moskvaga ko‘rsatgan yordamiga javoban ushbu sun’iy yo‘ldoshni uchirishga yordam beradi.
Janubiy Koreyaning yuqori martabali rasmiysi Rossiyadan ko‘plab mutaxassislar KXDRga josuslik sun’iy yo‘ldoshlarini uchirishda yordam berish uchun kelganini aytgan. KXDR so‘nggi bor noyabr oyida ayg‘oqchi sun’iy yo‘ldoshni uchirgan va 2024-yilda orbitaga yana uchta shunday qurilmani chiqarishga va’da bergan.
2022-yil sentyabrida KXDR ko‘p sonli sanksiyalar va BMT rezolyutsiyalariga zid ravishda, “dushman kuchlar” tomonidan hujum tahdidi yuzaga kelgan taqdirda profilaktik zarbalar berishga ruxsat beruvchi yadro quroli to‘g‘risidagi qonunni qabul qilib, o‘zini rasman yadroviy davlat deb e’lon qilgan.
2024-yilning mart oyida Janubiy Koreya va AQSH 2018-yildan beri birinchi marta KXDR tomonidan yuzaga kelishi mumkin bo‘lgan yadroviy tahdidga qarshi kurashish maqsadida keng ko‘lamli harbiy mashg‘ulotlar o‘tkazgan.
Harbiy tahlilchilarga ko‘ra, Shimoliy Koreyaning josuslik sun’iy yo‘ldoshlarini uchirishi, Pxenyanga o‘zining potensial raqiblari haqida harbiy ma’lumot to‘plash imkonini beradi.
Izoh (0)