Kecha, 31-may kuni AQSH prezidenti Jo Bayden Ukrainaga Rossiya hududini o‘qqa tutishda Amerika qurollaridan foydalanishga yashirincha ruxsat bergani haqida xabarlar tarqaldi. Xususan, bu haqda Oq uydagi manbalarga tayanib, Reuters agentligi xabar berdi. Biroq hozircha ushbu maʼlumot rasman tasdiqlanganicha yo‘q. Bundan oldinroq Yevropaning 11 ta mamlakati ham Ukrainaga taqdim etilgan qurollardan Rossiya hududidagi nishonlarga zarba berishga ruxsat bergan edi. Xo‘sh, G‘arbning bu yurishiga Rossiya qanday javob qaytaradi?
“Daryo” ushbu mavzu atrofida iqtisodiy tahlilchi Shuhrat Rasul va siyosatshunos Oybek Sirojovlar bilan suhbatlashdi.
Shuhrat Rasulning taʼkidlashicha, G‘arbning bunday qarorga kelishiga Rossiyaning yadroviy mashqlarni boshlagani sabab bo‘lgan.
“May oyining boshidan boshlab Rossiya armiyasi Xarkov yo‘nalishi bo‘ylab hujumga o‘tdi. Maʼlumotlarga ko‘ra, rus generallari 9-may kuniga qadar Xarkov shahrini egallab olishni reja qilgan bo‘lgan. Hozir Xarkov shahrida bo‘layotgan janglar mana shu rejaning mahsuli. Biroq eskalatsiyani yangi bosqichga ko‘targan narsa bu — Rossiya prezidentining taktik yadro mashqlarini amalga oshirish haqidagi buyrug‘i bo‘ldi. Yaʼni eskalatsiya jarayonini Rossiya kuchaytirdi. G‘arbning 11 ta mamlakati esa Rossiyaga javob tariqasida Ukrainaga berilgan qurollardan Rossiya ichkarisidagi nishonlarga zarba berishga ruxsat berdi”, — dedi iqtisodiy tahlilchi.
Biroq siyosatshunos Oybek Sirojov ushbu masalaga boshqacha yondashib, Rossiyaning Xarkovga hujumi aslida bufer hudud yaratish maqsadida amalga oshirilganini taʼkidladi.
“Xarkov Rossiyaga juda yaqin shahar hisoblanadi. Ukraina aynan Xarkov orqali Rossiyaning Belgorod shahriga bir necha bor hujum amalga oshirdi. Aynan shuning uchun Xarkov hududiga yangi front ochildi. Yaʼni Rossiyaning maqsadi Xarkov shahrini egallash emas, balki o‘zining xavfsizligi uchun bufer hudud yaratish. Hozir bu urushda qaysidir hududni egallash ustuvor ahamiyat kasb etayotgani yo‘q. Bu urushda asosiy maqsad — tomonlar bir-birini holdan toydirish. Yaʼni bu kurash G‘arb va Rossiya o‘rtasida kechmoqda.
Xarkovda yangi front ochilishi Ukrainaning ayrim harakatlarini cheklaydi. O‘zi nega Ukraina vaqti-vaqti bilan Rossiyaning Belgorod shahriga hujumlarni amalga oshirayotgan edi? Aslida, bu harakatlar harbiy nuqtayi nazardan hech narsa bermaydi. Bu, aslida, siyosiy nuqtayi nazardan Rossiyaning reputatsiyasiga jiddiy zarba. Yaʼni bu Rossiya jamoatchiligida urushga nisbatan norozilikni kuchaytirish uchun amalga oshirilayotgan edi.
Ukrainaning G‘arb bergan qurollardan Rossiyaning qaysi hududlariga zarba berishi va bu nima oqibatlarga olib kelishini tahlil qilsak, shu vaqtga qadar Ukraina G‘arb qurollari bilan faqat 1991-yilgacha bo‘lgan chegaralar kesimida hujum amalga oshirishi hamda Rossiya chegaralariga zarba berishi mutlaqo taqiqlangan edi. Buni AQSHning bir qancha siyosatchilari ham aytgandi. Lekin hozir bu masala o‘zgardi. Yaʼni G‘arb Rossiya ichkarisida beqarorlik vujudga keltirish uchun shunday qarorga kelgan. Chunki urushning borishiga front ortidagi jarayonlar ham taʼsir ko‘rsatadi”, — dedi siyosatshunos.
Shuningdek, Oybek Sirojov Jo Bayden maʼmuriyati Ukrainaga Amerika qurollaridan foydalangan holda Rossiya hududiga zarba berish borasida nega ikkilanayotganiga ham to‘xtalib o‘tdi.
“AQSH oldida yadro quroliga ega davlat sifatida o‘ziga xos masʼuliyat mavjud. Jo Baydenning siyosiy faoliyatiga eʼtibor bersak, 70-yillarda Amerika va Sovet Ittifoqi o‘rtasidagi yadro qurollarni qisqartirish bo‘yicha dasturlarda bevosita ishtirok etgan. Yaʼni Bayden Rossiyaning yadro potensiali qandayligini va yadro quroli qanday kuchga ega ekanligini o‘z tanasida his qilib ko‘rgan. Shu nuqtayi nazardan Jo Bayden yadroviy halokat qanday oqibatlarga olib kelishini juda yaxshi biladi. Shuning uchun AQSH bu masalaga ehtiyotkorlik bilan yondashmoqda”, — dedi Oybek Sirojov.
Suhbatning to'liq versiyasini “Daryo”ning YouTube’dagi sahifasida tomosha qilishingiz mumkin.
Izoh (0)