AQSHning Arizona shtati Finiks shahrida Federal qidiruv byurosi (FQB) idorasi yaqinida sobiq prezident Donald Trampning qurollangan tarafdorlari to‘plandi, deb yozadi “RBK”. Yaqinda uning Floridadagi qarorgohida FQB tintuv o‘tkazgan edi.
Yig‘ilganlardan biri aytishicha, guruh Trampni qo‘llab-quvvatlab, uning Mar-a-Lago qarorgohidagi, ularning fikricha, noqonuniy tintuvga qarshi norozilik bildirish istagida bo‘lgan.
FQB qayd etishicha, idora yaqinida taxminan 25 kishi “tinch tarzda” to‘planib, trotuarlarga va ko‘cha bo‘ylab joylashib olgan, ular byuroga tegishli hududga o‘tmagan. Keyinroq ular tarqala boshlagan.
Trampning uyida o‘tkazilgan tintuvdan keyin AQSH huquq-tartibot organlari, xususan, FQBga tahdidlar kelib tusha boshlagan. Byuro bunday tahdidlarni “nojo‘ya va xavfli” deb atadi. 12-avgust kuni Ogayoda AQSH Harbiy-dengiz kuchlari faxriysi, Trampning tarafdori deb taxmin etilayotgan shaxs FQB idorasiga hujum qildi, ammo qo‘lga olish chog‘ida otib tashlandi.
Shunday voqealar fonida respublikachilar Mar-a-Lagodagi tintuv va hujjatlar musodarasining qonuniyligini isbotlovchi materiallar e’lon qilinishini talab etdi. AQSH Adliya vazirligi ham shunday da’vat bilan chiqdi va tintuv uchun order ommaga havola etilishi kerak, deb hisobladi.
FQB agentlari 8-avgust, dushanba kuni Trampning Floridadagi Mar-a-Lago qarorgohida tintuv o‘tkazgan edi. The New York Times vaziyatdan xabardor manbalariga tayanib yozishicha, FQB Trampning uyini u Oq uyni tark etganidan keyin o‘zi bilan olib ketgan hujjatlar tufayli tintuv qilmoqda. Hujjatlarda maxfiy ma’lumotlar bo‘lishi mumkin.
Nashrga ko‘ra, AQSH milliy arxivi “ko‘p oylar davomida” 15 quti hujjatlarni qaytarishni so‘ragan va ushbu hujjatlar yo‘q qilinishi ehtimoli yuzasidan FQBga murojaat qilgan. “Janob Tramp o‘z prezidentligi davrida hukumat arxivlarida saqlanishi kerak bo‘lgan rasmiy qog‘ozlarni yo‘q qilib tashlagani bilan tanilgan”, — deb yozadi gazeta.
Trampning so‘zlariga ko‘ra, agentlar tintuv chog‘ida hatto uning seyfini ham buzib ochgan. Sobiq prezident FQB xatti-harakatlarini siyosiy tusga ega deb atadi. Uning ishonch bildirishicha, amaldagi prezident Jo Bayden FQBning tintuv o‘tkazish niyatidan xabardor bo‘lgan. Agar ish rasman ayblov e’lon qilishgacha borib yetsa, Tramp 2024-yilgi prezidentlik sayloviga o‘z nomzodini qo‘yish imkoniyatidan mahrum bo‘lishi mumkin.
Keyinroq ma’lum bo‘lishicha, FQB agentlari tintuv chog‘ida maxfiy hujjatlarning 11 ta to‘plamini musodara qilgan. Ro‘yxatda, shu jumladan, “o‘ta maxfiy” belgisi tushirilgan hujjatlar ham bo‘lib, ulardan faqat maxsus davlat muassasalaridagina foydalanish mumkin.
FQB agentlari Tramp qarorgohidagi tintuv chog‘ida qidirgan narsalar orasida yadro quroliga aloqador hujjatlar ham bo‘lgan. Bunday hujjatlar topilgan-topilmagani noma’lum. Tramp WP xabarini izohlar ekan, “yadro quroli haqidagi masala — bu aldoqchilik” dedi.
FQB agentlari Trampning uyidan hujjatlar, fotosuratlar va qaydlardan iborat jami 20 tacha qutini olib ketgan. Musodara qilingan hujjatlarning uch sahifali ro‘yxatida Trampning o‘z sobiq maslahatchisi Rojer Stounni afv etish haqidagi farmoni hamda “Fransiya prezidenti” haqidagi ma’lumot ham bor.
Politico ma’lumotlariga ko‘ra, jurnalistlar qo‘liga kelib tushgan tintuv uchun orderda aytilishicha, FQB Donald Trampni adolatga to‘sqinlik qilishda va josuslik haqidagi qonunni ehtimoliy buzganlikda gumonlamoqda.
Izoh (0)