FQB Trampning uyidan maxfiy hujjatlarning 11 ta to‘plamini topgan. Tintuv josuslik to‘g‘risidagi qonun buzilishi haqidagi ish bo‘yicha o‘tkazilgan

AQSH Federal qidiruv byurosi (FQB) agentlari 8-avgust kuni sobiq prezident Donald Trampning Floridadagi Mar-a-Lago qarorgohida o‘tkazilgan tintuv chog‘ida maxfiy hujjatlarning 11 ta to‘plamini musodara qilgan. Bu haqda The Wall Street Journal musodara qilingan materiallar ro‘yxatiga tayanib xabar bermoqda, deb yozadi Meduza.

Ro‘yxatda, shu jumladan, “o‘ta maxfiy” belgisi tushirilgan hujjatlar ham bo‘lib, ulardan faqat maxsus davlat muassasalaridagina foydalanish mumkin.

Trampning advokatlari qayd etishicha, sobiq prezident Oq uyni tark etguniga qadar, o‘z vakolatlari doirasida, topilgan hujjatlarni fosh qilgan. Trampning o‘zi aytishicha, FQB agentlari oshkor etilgan hujjatlarni musodara qilishi shart emasdi: byuro “siyosat o‘yinini o‘ynamasdan va Mar-a-Lagoga bostirib kirmasdan ham” ularni istalgan vaqtda olishi mumkin edi.

The Washington Post manbalariga tayanib xabar berishicha, FQB agentlari Tramp qarorgohidagi tintuv chog‘ida qidirgan narsalar orasida yadro quroliga aloqador hujjatlar ham bo‘lgan. Bunday hujjatlar topilgan-topilmagani noma’lum. Tramp WP xabarini izohlar ekan, “yadro quroli haqidagi masala — bu aldoqchilik” dedi.

FQB agentlari Trampning uyidan hujjatlar, fotosuratlar va qaydlardan iborat jami 20 tacha qutini olib ketgan. Musodara qilingan hujjatlarning uch sahifali ro‘yxatida Trampning o‘z sobiq maslahatchisi Rojer Stounni afv etish haqidagi farmoni hamda “Fransiya prezidenti” haqidagi ma’lumot ham bor.

Politico ma’lumotlariga ko‘ra, jurnalistlar qo‘liga kelib tushgan tintuv uchun orderda aytilishicha, FQB Donald Trampni adolatga to‘sqinlik qilishda va josuslik haqidagi qonunni ehtimoliy buzganlikda gumonlamoqda.

Eslatib o‘tamiz, avvalroq Donald Tramp, Mar-a-Lagodagi qarorgohida o‘tkazilgan tintuvlardan keyin, o‘ziga qarshi guvohlik berishdan bosh tortgan edi.

FQB agentlari 8-avgust, dushanba kuni Trampning Floridadagi Mar-a-Lago qarorgohida tintuv o‘tkazgan edi. The New York Times vaziyatdan xabardor manbalariga tayanib yozishicha, FQB Trampning uyini u Oq uyni tark etganidan keyin o‘zi bilan olib ketgan hujjatlar tufayli tintuv qilmoqda. Hujjatlarda maxfiy ma’lumotlar bo‘lishi mumkin.

Nashrga ko‘ra, AQSH milliy arxivi “ko‘p oylar davomida” 15 quti hujjatlarni qaytarishni so‘ragan va ushbu hujjatlar yo‘q qilinishi ehtimoli yuzasidan FQBga murojaat qilgan. “Janob Tramp o‘z prezidentligi davrida hukumat arxivlarida saqlanishi kerak bo‘lgan rasmiy qog‘ozlarni yo‘q qilib tashlagani bilan tanilgan”, — deb yozadi gazeta.