Rossiya tashqi ishlar vaziri Sergey Lavrovning Ukrainaga berilishi mumkin bo‘lgan xavfsizlik kafolatlari haqidagi bayonotlari Amerika Qo‘shma Shtatlari bilan olib borilayotgan muzokaralarga putur yetkazdi. Bu haqda Bloomberg nashri yozdi.
Manbaga ko‘ra, Lavrov xavfsizlik kafolatlari Rossiyani yakkalashga qaratilsa, bu Moskva tomonidan qabul qilinmasligini aytgan. Bu esa AQSH va Rossiyaning tinchlik bo‘yicha muzokaralarni izdan chiqarishi mumkin.
Endilikda Kreml Oq uyni xavfsizlik kafolatlaridan voz kechishga undaydi. Qolaversa, Rossiya va Ukrainaning bo‘lajak uchrashuvlarida prezidentlar qatnashmasligi mumkin. Bu esa Rossiyaga yangi sanksiyalardan qochishga imkon beradi.

Yevropalik amaldorlar Sergey Lavrovning bayonotlarini vaqt cho‘zishga bo‘lgan urinish sifatida ta’riflaydi. Ular Rossiya prezidenti Vladimir Putinning tinchlik kelishuviga erishishni xohlayotganiga shubha bilan qaraydi.
Rossiya diplomatiyasi rahbarining ta’kidlashicha, Ukraina prezidenti va Yevropa davlatlari ilgari surayotgan xavfsizlik kafolatlari Rossiyani yakkalash mantig‘i asosida quriladi. Kreml esa bunday kafolatlarni umuman qabul qilmoqchi emas.
Lavrov 2022-yili Istanbulda o‘tkazilgan Rossiya va Ukraina o‘rtasidagi muzokaralarni eslagan. Uning fikricha, o‘sha paytda ilgari surilgan xavfsizlik kafolatlari bugungi kunda ham dolzarbdir. Istanbulda Ukraina delegatsiyasi BMT Xavfsizlik Kengashining doimiy a’zolari — Rossiya, Xitoy, Fransiya, AQSH va Buyuk Britaniya kabi davlatlar ishtirokida xavfsizlik kafolatlari ishlab chiqishni taklif qilgandi.
Joriy yilning 18-avgust kuni Ukraina prezidenti Vladimir Zelenskiy va Yevropaning bir qator yetakchilari Oq uyda Donald Tramp bilan uchrashdi. Kun tartibidagi asosiy mavzu Ukrainaga xavfsizlik kafolatlari berilishi bo‘lgan.
Izoh (0)